Hemsereka Komeleya Rojnamegeran a Dîcle-Firatî (DFG) Dîcle Muftuoglu û Edîtorê Ajansê Mezopotamya (MA) Sedat Yilmaz çarçewa tehqîqatê Anqara de 29ê nîsane de ameybî destbendkerdene û 3yê gulane Roja Azadîya Çepemenîye de zî bi îdîaya 'endamîya rêxistine' tepişîyabî. 

Dîcle û Yillmazî Zîndanê Sîncanî ra mesajêk şawit. 

Mesajê xo de Dîcle vat: ''Nê wextî de pawitişê azadîya çapemenîye û nuştişê raştîyan sey sûcî yenê mojnayene, bêguman îqtîdar do bin bikewo. Îqtîdar seba ke emrê xo derg bikero hêriş keno. La vera têkoşînê azadîgîran bin bikewo. Ma venga pêro rojnamegeran danê ke seba pawitişê raştîye û rojnamegerîye vengê xo berz bikerê.Ma venga rêxistinanê komelê sivîlî û komelî danê ke wayîrê heqê xo yê agahîgirewtişî vejîyê. Nê rojê tarîyî qetî do biqedê. Vera tarîkerdişî ma do ser bikewê, çapemenîya azade do ser bikewa.''

Rojnamegerî Yilmazî zî îfade kerd ke ê xebaranê xo ra yeno sûcdarkerdene û vat: ''No operasyon operasyonê weçînayîşî bi. Êyê ke operasyonê weçînayîşî kenê do weçînayîşan de bin bikewê.''