Roniştişê Hemşaredara Bajarê Girdî yê Amedî ya verêne Gultane Kişanak a ke wezîfeyê ci ame xespkerdene û Hemsereka Pêroyî ya  DBPyî ya dewrê verênî  Sabahate Tuncel Mehkema Cezaya Girane ya Meletî de newe ra ame kerdene. Kişanake û Tuncele tewê roniştişî bîyî.

Tuncele bale ante ke sîstemê hukmkerdişî caardişanê 12ê êlule ra wertêr o û vat: ’’Vera ma huqûqêko taybet yeno caardene. Ma qala rejîmê yew merdimî kenê. No caardiş dewrê Hîtlerî de estbi. Kamo ke vera nê sîtemî yo yeno hukmkerdene. Vera têgêrayîşê kurdan ê sîyasîyî hêriş kenê û kenê ke bi zextî çîn bikerê la ma vînenê ke rixmê hêrişê înan têgêrayîşê kurdan gird beno. No ganî hînî hol bêro famkerdene ke na mesele bi şîdet û zextî çare nêbena.

Gultane Kişanak zî vat: ’’Ez qisey zî kena, progaganda zî. Tewrbîyayîşê falîyetanê partîya mi sey sûcî ramojnenê. No sûc ney karê min o. Heqê mi ê Qanûnê Bingeyênî yo.’’

Badê pawitişê Kişanake û Tuncele dozgerî waşt ke tepiştişê înan dewam bikero. Avukatanê zî vist vîrî ke muwekîlê înan sîyasetmedarê û ganî falîyetê înan ê sîyasîyî sey ‘’endamîye û propagandaya rêxistene’’ nêrê dest girewtene û waşt ke Kişanake û Tuncele serbest bêrê veradayene. Mehmeke qerarê dewamê tepiştişê her di sîyasetmedaran da û roniştişo bîn taloqê 9ê adar a 2010î  kerd.