Xîretê Rûsya yê seba newerakerdişê Peymana Adana dewam kenê. Peymana Adana serra 1998î de mabêna dewleta tirke û Sûrîye de ame kerdene. Wezîrê Pawitişî yê Rûsya Sergey Şoyguyî zîyaretê xo yê vizêrênî de Sûrîye de no waştiş newe ra vist rojdem.

Şoyguyî Şam de Serekdewletê Sûrîye Beşar Esadî û Şêwirmenê Asayîşê Neteweyî yê Sûrîye Alî Memlukî reyde pêvînayîş kerd. Rojdemê Şoyguyî de meseleyê Îdlîbî û Rojawanî estbî.

Ajansê dewleta Sûrîye SANA pare kerd ke pêvînayîş de peymana newîye ya Îdlîbî ya ke 5ê adare de mabênê dewleta tirke û Rûsya de ameye îmzakerdene, ''Rewşa Herêma Cizîre'' û ''Xîretê dewleta Sûrîye yê seba serdestîya çar hetanê welatî'' ameyî ercnayene.

Rojdemo bingeyî Rojawan bi

Rojnameyê El Arabî yê ke zanayîşê xo çimeyanê Şamî ra girewtî, da zanayene ke ''Newekerdişê Peymana Adana rojdemo bingeyî'' bi. Rojnameyê Şarq El Ewsadî zî babete viste rojdemê xo û eşkera kerd e pêvînayîş de xîretê rejîmê Sûrîye yê seba serwerîya welatî ameyî ercnayene.

Xîretê newerakerdişê Peymana Adana

Rojnameyî eşkera kerd ke Rûsya xîret kena ke Peymana Adana mabênê dewleta tirke û Sûrîye  newe ra bikera û ê wazenê ke ''Warê têgêrayîşî yê 5 kîlometreyan ra heta 10 kîlometreyan bibo 30 kîlometreyan.''

Eşkerayîya Sûrîye

Derheqê pêvînayîşî de Serekatîya Dewlete ya Sûrîye eşkerayîyêke daye. Eşkerayîye de ame vatene: ''Rewşa Herêma Cizîre, xîretê DYA yê destsernayîşê petrolî û dewlemendîya Sûrîye, gamê dewleta Sûrîye seba serwerî û aramîya herêmanê cîyayan ê welatî, xîretê seba qedînayîşê dormegirewtişê herêmîyî û mîyanneteweyî yê Sûrîye, wedaritişê caardişan, xîretê şarê Sûrîye yê seba qedînayîşê îzolasyonî ameyî ercnayene.''

Dima ke dewleta tirke û Rûsya-Sûrîye Îdlîb de pêkerd, Serekkomarê Tirkî Recep Tayyîp Erdoganî şibi Moskova û waştişê adirbirnayîşî kerdbi.

Esadî vatbi ke kurdî çin ê!

Pêvînayîşê 5ê adare yê mabênê Putînî û Erdoganî ra verî Beşşar Esadî kanalêka rûsan de qisey kerdbi û îdîa kerdbi ke: ''Kurdî Sûrîye de nîyê, dewaya kurdan zûr a û xeyal a.''

Foza Yûsif: Vatişê Esadî seba hemkarîya vera kurdan mesajêk o

Endama Heyetê Hemserekîye yê PYDyî Foza Yûsif cewab da vatişanê Esadî û vat: ''No vatiş vatişê Erdoganî temam keno. Her di hetî zî înkarkerdişî de pêkenê. Mesajê 'bêrê ma vera kurdan bibê yew' o.''