Tepişteyanê Zîndanê Kurkçulerî pare kerd ke 14ê temmuze ra dima vera îşkence û kerdişanê xiraban ê do dest pê grevê vêşanîye bikerê. Tepişteyan bi rayîrê keyeyanê xo derheqê grevî de agahîyî dayî, bale ante dewamkerdişê tecrîdê Îmraliyî ser.

Nameyê tepişteyanê sîyasîyan ser o eşkerayîyêke ameye dayene. Eşkerayîye de wina ame vatene: ''Tecrîdo girankerde yê Îmraliyî, teda û polîtîkayê dişmenîye zîndan de hînî vurîyayê tasfîyekerdişê ma yê fîzîkî. Ma hêdî ney qebul nêkenê. Ma do coka 14ê temmuze ra dima dest pê grevê vêşanîye bikerê. Çalakîya ma do 5 rojan bi hawayêkê dore dewam bikerê. Eke polîtîkayê teda û zorî nêqedîyê û waştişê ma nêrê qebulkerdene ma do çalakîya xo bivurnê çalakîyan bêwext û bêagêrayîşî. Ma do çalakîya grevê vêşanîye ya bidore ya 5 rojan sey hişyarîyêke, seba îdareyê zîndanî danê destpêkerdene.''