Wekîlê DEM Partî Sirri Sakikî derheqê tecrîdî, Rayraşîyayîşê Azadîye û weçînayîşanê 31ê adare de ANFyî rê qisey kerd.

Sakikî da zanayene ke tecrîdê Îmraliyî vera qanûnanê Tirkîya û mîyanneteweyîyan o û vat: ''Tecrîd de israrkerdiş bêmana yo. Hukmatî wextê muzakerayan de Îmrali vurnabî rayîrê awe la nika berê ci heta peynî qefilnayî. Na rewşe seba ameyoxê şaran û welatî xirab a. Eleqeyê şarî yê seba Rayraşîyayîşê Azadîye nîşenaya waştişê ci yê çareserî û haştîye ya. Ancî grevê vêşanîye yê zîndanan û nobetê edaletî zî vera tecrîdî dewam kenê. Şarê kurdî û hêzê demokrasîyî wedarîyayîşê tecrîdî û çareserîyêka mende wazenê.

Meseleya kurdan ewro bîye globale. Heyf ke nika averşîyayîşêko ke demokratîkbîyayîşî mojneno, çin o. Dewlete waştişanê haştî û edaletî peygoş kena. Tepişteyê nêweşî zîndanan de terkê mergî bîyê. Birêz Ocalan binê tecrîdêkê giranî de yo. Cewab nêdîyeno muracatanê seba pêvînayîşê Îmraliyî. Seba çareserîya  meseleyan akerdişê kanalanê dîyalogan hewce yo.''

Sakikî bale ante weçînayîşanê herêmîyan ê 31ê adare ser û vat: ''Seba ma prosesê mabênê 1ê nîsane-31ê adare zaf girîng o. Roja weçînayîşan de ma wazenê kêmasîyanê xo yê weçînayîşanê gulane tekafî bikerê, peynîya rejîmê qeyûman bîyarê û atmosferêkê haştîye awan bikerê. 8 serî yo cografyaya kurdan de îradeyê şarî çin hesibîyeno. Coka girîng o ke ma nê weçînayîşan de ser bikewê. Serkewtişê ma yê weçînayîşanê adare do hêzê têkoşînî yê kurdan eşkera bikero.''