Salman: Ez destê ê qehremanan ra maçî kena

Hunermend Îlyas Salmanî ard ziwan, zerrîya ey bi hezaran kesanê ke grevê vêşanîye de yê nêveşena û vat, “Dest û çimanê ê qehremanan ra maçî kena. Hêvî kena, hîna ke çîyêk bi weşîye înan nêbîyo ê do ser bikewê.”

Hunermend Îlyas Salmanî derheqê xoverdayoxanê grevê vêşanîye û rojeyê mergî yê ke vera tecrîdkerdişê Rayberê Şarê Kurdî Abdullah Ocalanî yenê viraştene de ANF’yî rê qisey kerd.

Salmanî ard ziwan, xoverdayoxan bi hawayêkê mafdarî bedenê xo daye verê vêşanîye, o heta peynîya paştdayîş dano înan û vat, “Ez do şora serdana înan. Seba ke hêvîye bida înan ez do şora înan bivîna. Hêvî kena hîna ke çîyêk bi weşîye înan nêbîyo ê do ser bikewê. Çunke ke heq nêno dayene, heqo yenê girewtene. Beno ke serdestîya AKP’yî ewro Kurdan ra vana ‘bêrê ma têserê bikerê’. Çi heyf ke, heta hesabdayîş nêbo, têserekerdiş zî nêbeno. Her çî ra ver ganî cewab waştişê çalakgeranê grevê vêşanîye rê bêro dayene û bado vajê, ‘bêrê ma têserê bikerê’.”

Salmanî bale ante serê şîdeto ke dayîkanê xoverdayoxan rê yeno kerdene û vatişê, ‘cenet binê linganê dayîkan de yo’ ard vîrî û vat, “Cenet binê linganê dayîkan de yo lebelê nê welatî de zî dayîkî binê linganê camêrdan de yenê pankerdene. No zext û no şîdet heme berhemê tersî yo. Zerrîya mi seba 7 hezar merdimî nêveşena. Ez dest û çimanê ê qehremanan ra maçî kena. Hêvî kena ê do ser bikewê.”

Salmanî bale ante serê bêhîsgêrîye mûxalefetî yê vera grevê vêşanîye û ard ziwan, 7 hezar merdimî kewtê grevê vêşanîye û dest bi çalakîyêka muhîme û girde kerda, netîceyê ci do baş bibo. Salmanî ard ziwan, çalakgerî do ser bikewê û vat, “7 hezar merdimî grevê vêşanîye de yê, verê merdişî de yê labelê ti meseleyê Sûrîye, problemanê weçînayîşî kena rojdem. Cuya 7 hezar merdimê weçînayîşî ra muhîmtir a.”