Hemserekê Pêroyî yê Partîya Demokratîke ya Şaran (HDP) Mîthat Sancarî kombîyayîşê grûba Mecîsî ya partîya xo de rojdem ercna.

Sancarî bitaybetî bale ante hêrişê vera HDPyî û sîyasetê demokratîkî û ser û îdîanameyê Dewaya Kobanê ya ke do 26ê nîsane de bêro kerdene vist vîr.

Sancarî ard ziwan ke îdîaneyê Dewaya Kobanê zî sey îdîanemeyê vera HDPyî bêbinge yo û vat: ''Ma her roje hemleyêka înan a newîye vînenê. Ê se kenê wa bikerê do ser nêkewê.  26ê nîsane de dewa dest pêkena ke îdîanemeyê ci derheqê serebûtanê 6 serrî verê cu de ameyo amadekerdene. Na dewayêka huqûqî nîya. Dewaya sîyasîye ya qesasî ya. Operasyonê tesfîyekerdişî yo hîra yo. Ma nika çatrayîro tewr muhîm ê palanê darbe de yê. Cehd kenê ke heqê sîyasetê demokratîkî destê HDPyî ra biancê û kurdan warê sîyasetî ra vejê teber. Na dewa de heqîqat, huqûq çîn o. Sey dewaya qefilnayîşî ya vera HDPyî bêbinge ya û do binkewo.''

Sancarî wina dewam kerd: ''Xora Mehkemeya Qanûnê Bingeyî zî mojna ke ma heqdar ê. Nika Serdozgerê Mehkemeya Berze seba ke nêeşkeno nayî sereraşt bikero ganî na mesele rojdemî ra vejo. Ganî dewa rojdemî ra cade bêro wardayene. Pê sîyasetî nêeşeknê vejîyê vera HDPyî. Coka wazenê pê zulm, zext, hukm û polîsan HDPyî bifatisnê. Ma do qerardar rayîrê xo rê dewam bikerê. Wa nayî ra şikê kesî/e çînêbo. Nê welatî de merdim biwîjdan estê. Her çî ra ver bi mîlyonan kesî nê welatî de têkoşînê heqîqet û edaletî rayra benê. Nê mîlyonî do kayanê înan bixripnê . No hêrişê têna vera HDPyî nê vera heme muxalefetê komelkî yenokerdene.  Seba ke waştişê xo bîyarî ca wazenê HDPyî rayîrê xo ra vejê. La do ê çirey ser nêkewê.''

Sancarî veng kerd Devlet Bahçelî zî û qiseykerdişê xo wina qedîna:  ''Têna çîyo ke zano hedeftirewtişê sîaysetê demokratîkî yo. HDP tîya  yo, Meclîs de yo, waran de yo, fabrîka de yo, kişta kedkar û kedkarî de yo. HDP her ca de yo û do her ca de bo. Ma tîya yê la 128 mîlyar dolarî ça de yê? Ma tîya yê  la mlîyarê ke qeyûman diznayî ça de yê? Êyê ke pê pasaportê grî ameyî remnayene ça de yê? HDP tîya mîyanê şarî de yo la pereyê erdlerzî ça de yê? Ey wertaxo qic reyêk ya nê persan ya bipersê ya zî cewabê ci bidê. Nê perûne ra ti mesuldar ê. HDP beno pîl û ver bi rojanê ke do hesabê nê bêhuqûqîyan bêro persene têkoşînê xo qerardar dano rayraberdene.''