Hemserekê Pêroyî yê HDPyî mîtîngê haştîye yê Silopî de vat ke ê ganî vera şerî îtîfaqê tewr pîlî awan bikerê. Mîtîngê Îstanbulî de zî xeylêk kesî ameyî destbendkerdene.

Şirnex

HDPyî Şirnex de bi wesîleya 1ê Êlule Roja Haştîye ya Dinya bi şîarê 'Şer merg o, haştîya cu ya, haştîye bipawê' mîtîngêk viraşt. Hemserekê PÊroyî yê HDPyî Mîthat Sancar, Wekîlê HDPyî Nûran Îmîr, Hasan Ozguneş, Huseyîn Kaçmaz, Remzîye Tosun, aktîvîstê TJA, Meclîsê Mayanê Haştîye, MEBYYA-DER û KESKî tewrê mîtîngî bîyî.

Hemserek Mîthat Sancarî mîtîng de qisey kerd û vat: ''Nika her kes hewceyê haştîye yo. Ganî ma vera şerî îtîfaqê tewr pîlî awan bikerê. Esteyê Hakan Arslanî zereyê tewreyî de danê babîyê ci.Şima vînenî dişmen senî verê merdeyan de têgêreno. Nê polîtîkayê şerî pêro erjanê merdimîye çin kenê. Ma do qetî verê nê polîtîkayanê şerî bigêrê. Tay kesî waştişê ma yê haştîye sey qelsîye vînenê. Nê! Seba ke ma çareserîya demokratîke ya meseleya kurdan wazenê ma vanê haştîye. Têkoşînê haştîye, têkoşînê demokrasî, azadî û têdûştî yo. ''

Mîtîng pê deyîranê Kadîr Çat û Koma Dengê Awazên Botanî qedîya.

Îstanbul

Hêzanê Kede, Haştîye û Demokrasî yê Îstanbulî Meydanê Îskeleyî yê Kadikoyî de bi şîarê 'Şer dano binkewtene, haştîye ser visnena' çalakîyêka pîle kerde. Çalakîye de sloganê sey 'Cinîye, Cuye, Azadîye', 'Şer nê haştîye' ameyî vatene.

Polîsan çalakîye de kortejê TJA, Mayanê Haştîye, merdimanê tepişteyan ê Nobeta Edaletî girewt binê ablûqa. Rojnamegerî zî hetê polîsan ra ameyî derbkerdene û warî ra ameyî dûrvistene. Polîsan Maya Haştîye Zeynepe Calihan û rojnamegera bi nameyê Zîlane zî tede 4 kesî pey ra kelemçe kerdî û destbend kerdî. Wexto ke polîsan pê zorî 4 kesî siwarê wesayîtê xo kerdêne girseyî pê sloganê 'Cinîye, Cuye, Azadîye', 'Biciwîyo xoverdayîşê dadîyan' nêrazîbîyayîşê xo mojna.

Çalakîye de sloganê 'Hezar selamî bo Îmrali rê', 'Hakan Arslan bêmerg o' ameyî vatene. Girseyî da zanayene ke heta ke dadîyî nênê ê çalakîye nêkerê. Dima girse seba destbendkerdeyan ver bi Îskeleyê Emînonuyî şi. Îskeleyê Emînonuyî de zî cinîyê ke alaya HDPyî berz kerdêne pê îşkenceyî ameyî destbendkerdene. Dima Mayê Haştîye zî tede 75 kesî ameyî destbendkerdene û pey ra ameyî kelemçekerdene. Girseyê çalakîye pê sloganan vera polîsan nêrazîbîyayîşê xo mojna.

Girseyî dima pê tîlîlîyan û sloganê 'Biciwîyo xoverdayîşê dadîyan' çalakîye qedînaye