Hemserekê HDPyî Mîthat Sancarî vizêr kombîyayîşê xo yê çapemenîye seba ke cuya kedkaranê çapemenîye birîsk nêba batal kerd. Sancarî bi vîdeoyêkî  rojdem ercna. Beşêkê qiseykerdişê Sancarî wina yo:

''Ma nê prosesê krîzî de  Koordînasyonê Krîzê Merkezîyî awan kerd. Koordînasyonê ma tim îstîşareyan keno. Ma armanc kenê ke zanayîşê rastikênî bidê şarê xo. 

Tebdîro tewr girîng ê vera nê vîrusî no yo ke ganî ma bi hawayêkê komî cayêk de nêrê pêser. Yeno waştene ke ma keyeyan ra mevejîyê. No rast nîyo ma ganî paştî bidê, moral bidê yewbînan.

 Ciwanê partîya ma xîret kenê ke hetkarîye biresnê kokiman û hewcedaran. La têna ciwanê partîya ma nê, pêro ciwanî na babete de xîret bikerê. Ma venga ciwanan danê ke mabênê xo de torra têkilîye û paştdayîşî bironê. 

Ma seba vengdayîşê hukmatî tay pêşnîyazî pêşkêş kerd ke wina yê:

-Hecedaran rê bêpere hetkarîya hacetê hîjyenî û werdî ganî bêra kerdene

-Weşkerdiş ganî bêpere bêro kerdene

-Ganî nêweşxaneyê taybetî zî bi statuyê nêweşxaneyê umûmîyî xizmet bikerê

-Xebatkaranê umûmî û kargehan ê taybetan rê zî ganî heqê îzînê bipereyî bêro dayene

-Xizmetê sey awe, înternet, ceyran ganî bêpere bêrê dayene

-Tepişteyê nêweşî, kokimî, dadîyî û diganî ganî bêrê veradayene

Ma vînenê ke hukmat bi hawayêkê binîzamî û sîstematîkî tênêgêreno. Ganî hukmat netîceyanê ekonomîkan û komelkîyan ê tebdîran zî biercno. Ma rê qîm yeno ke hukmat bi hawayêkê eşkerayî zanayîş nêdano rayaumûmîye. Ganî hukmat sere de SES û TTB dezgehanê weşîye reyde îstîşareyan bikero. Ganî Meclîs de bi tewrbîyayîşê têdûştî yê pêro partîyan komîsyonêk bêro awankerdene.

Tehlûke çend pîl beno wa bibo bizanê ke ma têna nîyê. Ma bi paştdayîşî nê tehlûkeyî ra do bixelisê. ''