Mehkemeya Qanûnê Bingeyî îdîanameyê diyînî ke derheqê HDPyî de ame amadekerdene qebul kerd. MYKyê partîye ke gama ke qerar ame girewtene kombîyayîş kerdêne, derheqê qerarî de ercnayîş kerd. Mabanê kombîyayîşî de Hemserekanê Pêroyî yê HDPyî Pervîne Buldan û Mîthat Sancar û endamanê MYKyî eşkerayîye daye.

Sancarî vat: ''Îdîanameyê semedê qefilnayîşê partîya ma ewro ame qebulkerdene. Na  semedê Tirkîya bêtalîhîyeya pîl a. Xora şima zanê  HDP tim hetê îqtîdarî ra sey hedef yeno ramojnayene û yeno tehdîtkerdene.  No operasyonêko sîyasî yo ke her kes eşkera vîneno. Ma pêrune dî ke îdîanemeyo verên senî pûç û veng bi. Mehkemeya Qanûnê Bingeyî o peyser açarna la nika rimxo ke çîyêk zî nêbidilyayo îdîaname ame qebulkerdene. No huqûqî nêyo.

Hêrişê vera HDPyî yê Îzmîrî û qetilkerdişê Denîze Poyraz ramojna ke vera partîya ma senî kayî yenê kaykerdene. Planê kaosî yê gonîn û leyminî bîyî operasyonê sîyasîyî ser. Hela winayênî de ganî no îdîaname biameyêne redkerdene. Bêşik o ke dozgerê na dewa Serdozgerê Komare yê Mekemeya Berze nêyo. No îdîaname Merkezê Pêroyî yê MHPyî de ame amadekerdene û yewîyanê huqûqî yê Qesre de ame temamkerdene. Dozgerê dewa îqtîdar û avûkatê ci şar o, bitaybetî zî şarê kurdî yo. Qerarê na dewa do têna semedê HDPyî nêbo. Eke  Mehkemeya Qanûnê Bingeyî qerarê qefilnayîşî bigêro no beno qerarê qefilnayîşê aye zî.

Nika wezîfe keweno şarê kurdî, temsîlkaranê şaranê ke têkoşînî rayra benê û hêzanê demokrasîyî yê Tirkîya û rayapêroyîya demokrasîyî yê dinya. Ma  qerardar ê, ma do HDPyî bipawê. Wa şikê çewî/e çînêbo ma do HDPyî bidê ciwîyayenê. Qerar senî beno wa bibo têkoşînê ma do dewam bikero. HDP do plananê leyminan pûç vejo. Ma soz dayo embaza xo Denîze ma do HDPyî pîlêr bikerê.''