Serekwekîlê Grûba HDPyî Saruhan Oluç derheqê Kongraya 5. ya HDPyî de qisey kerd.

Oluçî vist vîrî ke kongre senî şertanê zehmetan de ameye kerdene û vat: ''Rixmê zext, operasyon, destbendkerdiş û tepiştişan kongre zaf sixletî û bi coşî ameye kerdene. Reyna rîyê vayeyî ra, seba ke benzîn û mazot bîyî vay hetê resnayîşî ra zî tengayî bibî. La rixmê zextan û krîzê ekonomîkî tewrbîyayîşê komgre hole bi, hedefê ma rê nêzdî bî. Şar vera zextan wayîrê îradeyê xo vejîya û tewrê kongre bi.''

Oluçî bale ante muhîmîya kongre ser û vat: ''Yew hetî ra dewaya qefilnayîşî, dewaya Kobanê û hetê bînî ra prosesê vîjnayîşî yê Tirkîya dest pêkerdo. Coka ganî kongre mesaj bidayêne her kesî/e. Ma goreyê nê amadekarîya xo kerdbî. Mesajê ma hem îqtîdar, hem muxalef û hem zî komelî rê bibî û ma nê mesajê bi hewayêkê xurtî dayî.

Ma îtîfaqê demokratîkî têna semedê vîjnayîşî nêwazenê. Ma wazenê ke badê vîjnayîşî zî dewam bikero. Eke Tirkîya de îqtîdar bedilîyeno ganî demê neweyî de demokrasî bêro înşakerdene. Ganî hem meclîs hem têkoşînê teberî bêro xurtkerdene.''

Oluçî wina dewam kerd: ''Îmrali de bêhuqûqîya pîle yena kerdene. Hem birêz Ocalan û hem zî embazê ci yê ke ûca de ganî avûktan û merdimanê xo reyde pêvînayîş bikerê. Îqtîdar wina ramojneno ke Îmrali de pêvînayîşî yenê kedene. Ma nê raşt nêvînenî. Ganî avûkatan dir rî bi rî pêvînayîş bêro kerdene. Ganî rewşa Îmraliyî fekê birêz Ocalanî ra bêro eşnawitene. Pawitişê komelî no yo. Ganî tecrîd bêro wedaritene û avûkat û heyetê sîyasîyî pêvînayîş bikerê. Na têna meseleya kurdan û HDPyî nîya. Ganî muxalefet vera tecrîdî vejîyo û vajo ke wa her çî eşkera bêro qiseykerdene.

HDP semedê çare û demokrasîyî hêzê înşayî yo. Ma îqtîdar û muxalefetî rê no eşkera vat xeyalê Tirkîyaya bê HDP mekerê. HDPyî sey hêvîyêke kongre de qerardarîya xo mojna. Êyê ke wazenê HDPyî biqefilnê û sîyasetê demokratîkî yê kurdan tesfîye bikerê kongre înan rê bîye cewab. Ma hem mesaj da îqtîdar hem zî da muxalefetî. Şar wayîrê îradeyê xo vejîya. Ma reyna hêzê mojna dost û dişmenî.''