Kadîr Karabak wexto ke 2017 de Antalya de xebitîyayêne bi qiseyanê îtîrafkerêkî amebi tepiştene. Kadîr Karabak Zîndanê Wanî de vera binpaykerdişê heqan rojeyê mergî kerdbi û dima ke waştişê înan ameybî qebulkerdene roje qedînabî. Dima Karabak surgunê Zîndanê Tekîrdagî amebi kerdene.

Karabako ke bi sûcdarîya 'endamê TKP-MLyî yo' tepişîyabi cezaya ci 15ê teşrîna peyêne ya 2022yî de qedîyabi. La çar reyî înfazê ey ame vêşanyene. Karabak qaşo çeleyê 2023yî de zî do biameyêne veradayene la ancî înfazê ci ame vêşnayene.

Heyetê Îdare û Çimdarîye yê Zîndanan tewr peyên teşrîna verêne ya 2023yî de bi îdîaya ke Karabak kincanê pakîyan xo rê dano û tay kitaban waneno tehlîyeyê ey asteng kerd.

Karabakî dima heyetî de pêvînayîş kerd la heyetî ey rê vat 'Ti do se bikerî zî ma do to vera nêdê.' Karabakî naye ser o dest pê grevê vêşanîye kerd. Karabak wazeno cade vera bidîyo. Grevê vêşanîye yê Karabakî 2 mengî yo dewam keno.