‘Seba ke ma cuyêka başe waşt, ma tewqîf bîyî’

Karkerê ke înşaatê Rasteyê Teyarayan yê 3. yê Stenbolî de xebetîyayênê, seba ke şertê xirabinan yê înşaatî protesto kerdbî, ameybî tewqîf kerdene. Karkeran mesajêk erşawit û dîyar kerd ke ê seba ke cuyêka hîna başe waştî, tewqîf bîyî.

Karkerê rasteyê teyarayan yê neweyî 14ê êlule de dest bi çalakîya protestokerdişê şertanê xirabinan yê înşaatî kerdbî.

Karkerî eynî şewe ameybî tepiştene û înan ra 24 kesî tewqîf bîbî. Sendîkaya Înşaat-Îşî Zîndanê Sîlîvrî de karkerî zîyaret kerdî û zîyaret ra dima mesajê karkeran hesabê Twîtterî ra ame pare kerdene.

Mesajê karkeran wina yo:

“Hewl dayî waştişanê ma yê tewr merdimîyan bi zorî bipelçiqnî. Nîmeyê şewe eştî koguşanê ma ser û beranê koguşanê ma şikitî. Ma bi no hawa ameyî tepiştene û ma raştê neng û heqaretan ameyî. Seba ke ma cuyêka hîna başe waşt, ma bi hawayo bêhuqûqî ameyî tewqîf kerdene û erzîyayî zîndanan. Ma sucdar nîyî û gêrayîşê heqî suc nîyo. Esil sucdarî patronê ke ma ê şertan de dayêne xebetnayene yî. Ma tîya ra veng danî raya pêroyî; Wa ti kes ma meraq nêkero. Moral û kefê ma ca de yî. Ma heme dostê ke destek dayî ma silam kenî. Karkerê înşaatî kole nîyî.”