Parlamentera Partîya Sosyalîst a Swîssî ya Meclîsê Neteweyîyî Laurence Fehlmann Rîelle derheqê îxlalkerdişê heqan de, tirêm Tirkîye ver bi çîyî yena antene, nizdbîyayîşê Ewropa û tecrîdê serê Ocalanî de ANFyî rê qisey kerd.

Rîelle sîyasetê Tirkîye nizd ra teqîb kena û meseleyê kurdan ser o zî nizd ra eleqedar bena. Rîelleya ke her game têkilîyanê mabênê Swîssî û Tirkîye krîtîk kena, heman wextî de konferans û panelanê ke tewrê ci bîya de bale ancena îxlalkerdişê heqan.

'DERHEQÊ AMEYOXÊ TIRKÎYE DE EZ BÊUMÎD A'

Rîelle qiseykerdişê xo de vat: “Derheqê ameyoxê Tirkîye de fikarê ma roje bi roje benê zêdeyêr. Dimayo ke Erdoganî weçînitişan de qezenc kerd heme dormeyan ser o otorîte viraşte. Na otorîteya xo sere de hemverê muxalefetî de vera heme dormeyanê ke ê rê serre nênanê ro sey wesîteyêka zextî şuxulneno. Çi kesê ke hemverê Erdogan û rejimê ê de vindenê sey sucdarêko potansîyel yenê vînayene.e.

Îxlalkerdişê heqan ê Erdoganî tenya bi Tirkîye bisînor nêyê. Polîtîkaya ê ya Sûrîye û nê wextanê peyênan de seba ke hîna zaf paştîdayîşê dormeyanê neteweperweran qezenc bikero hêrişê serê Efrînî ramojnenê ke ê îxlalkerdişê heqan de sînorî vîyarnayê.”

 ‘ERDOGANÎ DÎKTATORÎYE AWAN KERDE’

Rîelleye ard ziwan ke dimayo ke Erdoganî weçînitişan de qezenc kerd Tirkîye de dîktatorî awan kerde û wina vat: “Seba ke hema zî meclîs û hukm raşte ra nêwedarîyayê ma halê nikayênî sey sîstemêkê tam dîktatoryalî name nêkerê zî bicaardişî ramojnenê ke sîstemê dîktatorîye serdest o.”

 ‘EWROPA ERDOGAN BIHÊZ KERD’

Reîlle dewamê qiseykerdişê xo de vat: “Bêşik eke ewro Erdogan ameyo na nuqta nê de berpirsîyarîyêka Ewropa ya pîle esta. Ewropa polîtîkayê hukmatê Erdoganî sey Îslamê moderatî û gamê modernî ercnayî û paştî daye ê. Tewr peynî de meseleyê multecîyan de pereyî dîyayî bi Tirkîye. Nê  heme bîyî sebeb ke Erdogan bi asanî sîstemê xo yê dîktatorî awan bikero. Welatê ke dîktatorîya Erdoganî rê paştî danê sereyê înan de Îngilîstan û Almanya yenê. Welatê Ewropa seba menfaatanê xo hemverê rejimê Erdoganî de bêveng manenê.

Ganî Ewropa têkilîyanê xo yê Erdoganî de sînorêk rono. Tirkîye ewro mîyanê krîzê îqtîsadîyî de ya. Seba ke Erdogan bêro zihîfkerdene ganî hemverê Tirkîye de mueyyîdeyê îqtîsadîyî bêrê bicaardene. Konseya Ewropa û Parlamentoya Ewropa ganî hemverê îxlalkerdişanê heqan ê Tirkîye de bêveng memanê.”

WEÇÎNITIŞANÊ CAYÎYAN DE ERDOGAN EŞKENO BÊRO ZIHÎFKERDENE

Reîlle ard ziwan ke seba rejimê Erdoganî bêro zihîfkerdene weçînitişê cayîyî firsendêkê muhîm ê. Ganî muxalafetê Tirkîye xusûsen bajaranê pîlan ê sey Stenbolî de namzedanê hemparan vejo û qezenc bikero.

BÊVENGÎYA CPT Û KONSEYA EWROPA NÊNA FAMKERDENE

Reîlle vat ke: “Ez wazena nê vajî ke rewşê Ocalanî xeylî muhîm o. Bi hawayêkê eşkerayî heqê Ocalanî yenê îxlalkerdene. Ocalan halkerdişê meseleyê kurdan de aktorêko muhîm o. Netîce de kurdî Ocalanî sey rayber vînenê. Şexsîyetêk ke hende nuqteyêka muhîme de yo îxlalkerdişê heqanê ci nêno qebûlkerdene. Îxlalkerdişê heqanê Ocalanî de Konseya Ewropa, Parlamentoya Ewropa û CPT zî berpirsîyar ê. Bêvengmendişê nê sazîyan nêno famkerdene. Ganî ê na babete biyarê ziwan.”

Peynîya qiseykerdişê xo de Reîlle vat ke : “Ganî seba ke bale biancîyo şertanê Ocalanî têgêrayîşêko mîyanneteweyî ke her dormeyî ra merdiman xo de hewêneno bêro awankerdene. ”