Seba Ocalanî Muzeya Louvre û garê trêne de çalakî

Ciwananê kurdan vernîya Muzeya Louvre ya tarîxîye ya Parîsî û garê tewr girdî yê şaristanî de hemverê tecrîdê serê Ocalanî de çalakîyî viraştî.

Têgêrayîşê ciwanan ê bi nameyê Tevgera Ciwanên Şoreşger û ciwanê têgêrayîşê wendekaran YXK û JXKyî Gare du Nord  (Garê Vakurî) de çalakîyêka bêîtaatîye viraşte.

Çalakîye de posterêko pîl ê Ocalanî û beyraqê PKK û KCKyî ameyî kiriştene, hetêna ra fotografê hîrê cinîyanê şorişgêran ê kurdan ê ke serra 2013 de Parîs de ameybî qetlkerdene zî ameyî kiriştene.

Ciwanan heman wext de pankartêk ke ser de bi firanskî „Dewleta tirkî ya faşîste Kurdistan ra biteqezye!, amebi nûştene ame akerdene.

Ciwanan bi slogananê “Bijî Serok Apo” û tîlîlîyan a pîya garî ra bi vejîyayî û çalakîya xo qedênaye.

VERNÎYA MUZE DE KITABÊ OCALANÎ AMEYÎ WENDENE

Organîzasyonê ciwanan vernîya Muzeya Louvre ya namdare de zî ameyî têhet û tecrîd protesto kerd, ciwanê ke vernîya muze de roniştî kitabê Ocalanî wendî.

Çalakîya ke tede velawekê ke bale antêne tecrîd û hêrişanê dewleta tirkî ser ameyî vilakerdene, xeylî bala turîstan ante xo. Ciwananê kurdan turîstan dir û ciwananê dormeyî dir halê Ocalanî ser o qisey kerdî û kesanê eleqedaran rê broşurê ke nûşteyê kitabê Ocalanî tede estê dayî.