Temsîlkaranê partîyanê sîyasîyan û rêxistinanê komelê sivîlî waşt ke wa Abdullah Ocalan azad bibo û meseleya kurdan bêra çareserkerdene. Temsîlkaran venga pêro kesan da ke wa tewrê Rayraşîyayîşê Gemlîkî yê 19ê teşrîna peyêne bibê.
MED TUHAD-FED, ANYAKAY-DER, HDK, HEDEP, TJA, DBP, Buroyê Huqûqî yê Asrinî, Alîmanê Dînîyan û MKMyî pîya derheqê Rayraşîyayîşê Gemlîkî yê 19ê teşrîna peyêne de kombîyayîşê çapemenîye kerd.
Hemsereka MA-TUHAYDERî Dîleke Sonmez Demîr eşkerayîya hempare çapemenîye rê wende. Eşkerayîye de dîya zanayene ke dewleta tirke seserra xo ya diyîne de zî israr kena ke meseleya kurdan çareser nêkera coka tecrîdê vera Rayberê Şarê Kurdî Abdullah Ocalanî kena giranêr.
Demîre vat: ''25 serrî yo Birêz Ocalanî rê tecrîdêko giran yeno ferzkerdene. Bi tecrîdî verê çareserîya meseleya kurdan yena girewtene. Coka ganî şiknayîşê tecrîdî bino rojdemê şarî yo verên. Tecrîd teyna kurdan ney pêro hêzanê azadî û demokrasîyî eleqedar keno. Vera tecrîdê Îmraliyî mesuldarîya ma pêroyînan est a ke têkoşînê demokrasî û azadîye berz bikerê.
Coka ma venga pêro kesan danê ke 19ê teşrîna peyêne de tewrê Rayraşîyayîşê Gemlîkî bibê. Seba çareserîya meseleya kurdan ma wazenê ke wa Birêz Ocalanî azad bibo. Seba ney Rayraşîyayîşê Gemlîkî do bibo gamêka azadîye.''
