Goreyê doneyanê Merkezê Pêroyî yê ÎHDyî zîndananê Tirkîye û Kurdistanî de 402ê ci giran pêro pîya hezar û 154 tepişteyê nêweşî estê. Nê nêweşanê giranan ra yewe zî Sîsê Bîngola 85 serrî ya ke Zîndanê Girewteyî yê Tîpê Tyî yê Tarsusî de yena tepiştene.

Seba Bîngole hetê Nêweşxaneyê Dewlete yê Mûşî ra raporê “Weşîya ci seba zîndan de mendişî destdayî nêya” ame dayene. La rixmê nê raporo ke hetê Sazîya Tibî ya Edlî (ATK) ya Stenbolî ra ame dayene de vajîya ke “zîndan de mendişê ci de seba cuya aye tehluke çinyo” û vernîya tehlîyeya ci amî girewtene. 

DOMANANÊ XO NÊŞINASENA

Endama Komîsyonê Zîndanî yê ÎHDyî yê Şaxê Amedî Derya Yildirime vat ke Bîngole semedê problemanê xo yê weşîye ra nêeşkena zîndan de bimano û ganî tavilî serbest bêro veradayene. Yildirime raporê ATKyî ard vîrî û vat bi nê raporî ê vernîya tehlîyekerdişê Bîngole gênê û vat qerarê ke waştişê tehlîyeya ci red kenê huqûqî nêyê.

Yildirime ard ziwan ke vîrê maye Sîsê bîyo kemî û na yewe ra domananê xo zî nas nêkena û vat: “Ma komîsyonanê Zîdanî yê Edene û Mêrsînî yê ÎHDyî dir mîyanê têkilî de yê û seba bieşkê serdanê Bîngole bikerê do teşebusan bikerê.” 

SEBA SÎSÊ BÎNGOLE KAMPANYAYA ÎMZAYAN

Dewamê qiseykerdişê xo de Yildirime vat: “Seba ke ma bale biancê halê Bîngole ma do Mehkemeya Qanûnê Bingeyênî rê muracat bikerê û heman wextî de kampanyayêka îmza bidê destpêkerdene.”

SÎSÊ BÎNGOLE…

Sîsê Bîngole dewa Badanî ya pabesteya qezaya Gimgimî ya Mûşî de 6ê Nîsane 2016 de gama erzîya keyeyê ci ser pîya bi keyayê dewe Alî Riza Şahîn û di dewijan gîrîya binê nezaretî. Netîceyê muameleyanê îfadeyê ci yê Fermandarîya Cendirmeyî de bi îdîaya “endama organîzasyonî” hetê Adlîyeya Vartoyî ra qerarê tepiştişî ame dayene û amî şirawitene Zîndanê Tîpê Eyî yê Mûşî.

Dima ke zîndan de 2,5 mengî mende roja 23ê Hezîrane 2016 de vejîya mehkema û halê aye wê weşîye, wextê tepiştişî û emrê ci gîrîya verê çiman û amî tehlîyekerdene.

Dima ke cezaya ci hetê Mehkemeya Îstînafî ya Erziromî ra 2017 de amî tesdîqkerdene ancî şirawîya Zîndanê Tîpê Eyî yê Mûşî. 4ê Teşrîna verêne de sewqê Zîndanê Girewteyî yê Tîpê

Tyî yê Tarsusî amî kerdene. Rîyê problemanê weşîye yê giranan ra maye Sîsê 2ê Teşrîna peyêne de amî berdene nêweşxane.