Wezîrê Karanê Zereyî Seehoferî derheqê çeteyanê DAÎŞ’ijan ê ke hemwelatijê Almanya yê û destê YPG’yî de yê de vat, “Dimayo ke yew bi yew ameyî etudkerdene ma do înan bigêrê, labelê ma vera ci yê ke sey hawayêkê grube bêrê ardene bi Almanya.”
Seba hemwelatijanê Almanan ê ke çeteyê DAÎŞ’î yê û bi operasyonanê hêzanê YPG/QSD'î weş ameyî girewtene, rayberîya Berlînî hîna çareyêk nêdîyo. Dimayo ke Serekê DYA Donald Trumpî vengdayîş bi Almanya û welatanê bînan ê Ewropa kerd û vat, “Hemwelatijanê xo bigêrê û muhakeme bikerê”, bala ancîyabî serê hemwelatijanê Almanya yê ke çeteyê DAÎŞ’î yê.
Ame vatene, sere de cinî û domanî 200 ra zêdeyî hemwelatijê Almanya yê ke tewrê DAÎŞ’î bîyê, destê YPG'yî de yê. Tewr peynî de Wezîrê Karanê Zereyî Horst Seehoferî derheqê rewşa Almanijanê DAÎŞ’î de qisey kerd û ard ziwan ke na babete de ê bi hawayêkê hesasî xebitîyenê. Seehoferî bernameyê "Berîcht aus Berlîn" rê qisey kerd ke, bername do şan de ARD’î de biweşanîyo û vat “Ganî dewlete derheqê nê kesan de biba wayîrê zanayîşanê hîrayan.”
Ganî ma bizanê ke mîyanê refê DAÎŞ’î de se kerdo
Seehoferî qesawetê xo yê serê asayîşê Almanya ardî ziwan û vat, “Ganî ma her yewê înan bi hawayêkê hîrayî edut bikerê û bizanê ke mîyanê refê DAÎŞ’î de se kerdo. Bi nê hawayî ma do bieşkê derheqê înan de cipersayîşan bikerê a yan zî muhakeme bikerê. Eksê ci ma nêeşkenê înan bi nê hawayî bigêrê. Çunke nê kesan zaf reyan bi nasnameyanê cîyayan cuya xo dewam kerda.”
Wezîr Seehoferî ard ziwan ke ê vera ci yê ke DAÎŞ’ijî sey hawayêkê grube bêrê ardene bi Almanya. Pisporî zî vanê, ganî rayberîya Berlînî berpirsîyarîya xo ya na babete ra nêrema. Weqfê Zanistî û Sîyasetî ra pisporê Rojakewtena Mîyanêne Guîdo Steînbergî ard ziwan, Almanya mecbûr a hemwelatijanê xo yê ke destê YPG'yî de yê bigêra û vat, “Senî ke Almanya terorîst û sûcdaranê xerîban şawena Tûnis, Lîbya û Rûsya, ganî hemwelatijanê xo zî welatanê bînan ra bigêro.”
Hukmato federal ê bi serekatîya Angela Merkele, îdîa keno ke ê nasnameyanê DAÎŞ’ijan ê ke weş ameyê girewtene nêeşkenê tespît bikerê. Labelê no argûman rastîye ra dûrî yo. Ame vatene, endamê dezgehê îstîxbaratê teberî yê Almanya BND şi kampanê bextwaştoxan û hepisxaneyanê Vakurê Sûrîye yê ke DAÎŞ’ijî tede yê û tespît kerd ke kamcînî hemwelatijê Almanya yê.
Netîceyê operasyananê yewîyanê taybetan ê YPG'î de Vakurê Sûrîye de 2800 zêdeyî DAÎŞ’ijî ameybî girewtene. Nê 880 çeteyan ra 46 ci dewletanê cîyayan ra yê, ke zafêrê înan welatanê rojawanî ra yê. Heta nika teyna Fransa, Endonezya, Rûsya, Fas û Sûdanî hemwelatijê xo YPG'î ra waştî.
