Delegasyonê Seba Çareserîya Meseleya Kurdan û Vera Tecrîdî nêzdî de Îstanbul de tay pêvînayîşî kerdbî. Delegasyonî ra wekîla Fransa Segolane Amiot derheqê pêvînayîşanê înan û tecrîdê vera Rayberê Şarê Kurdî Abdullah Ocalanî de qisey kerd.

Segolene îfade kerd ke eke tecrîdê vera Abdullah Ocalanî biqedo meseleya kurdan do çareser biba, tedayî do biqedê. Segolene vat: ''Seba ke vera tecrîdî veng bêro vetene ma tîya de yê. Ganî nêro vîrakerdene ke Ocalan 75 serre yo û 25 serrî yo Îmrali de tecrîdkerde yo. Rewşa ey a weşîye nêzanîyena. Tecrîdo mutleq îşkence yo. Ganî Tirkîya peymananê mîyanneteweyîyan bîyara ca.''

Segolene dîyar kerd ke dezgehê Ewropa zî hemkara na bêhuqûqîya Tirkîya benê û vat: ''Tewirê Ewropa hêz dano dewleta tirke ke bêhuqûqîyanê xo rê dewam bikera. Ganî Komîteya Vergirewtişê Îşkenceyî (CPT), Neteweyê Yewbîyayeyî (NY) û dezgehê bînî hemkarê tecrîdî nêbê. Ganî bira heqê hêvîye ya Mehkemeya Heqanê Merdiman a Ewropa (MHME) bêra caardene.''

Segolene ard ziwan ke seba ke Tirkîya meseleya multecîyan de wezîfeyê fren û fîltre kena Ewropa kerdişanê ci rê vengê xo nêkena. Segolene vat: ''Birêz Ocalan seba şarê kurdî sembol o. Seba haştîye wedaritişê tecrîdî û caardişê azadîya Abdullah Ocalanî gama verên a.''