Festîvala Kulturê Kurdan a Mîyanneteweyîye ya 31. bi şîarê 'Serra 100. ya Lozanî de meseleya kurdan rê çareserîye,  Kurdîstanî rê statu' Bajarê Frankfurtî yê Almanya de ameye kerdene.

Hemserekanê KCDK-E Engin Sever û Zubeyde Zumrut, hemserekê KON-MEDî Emine Ruken Akça û Kerem Gok, Hemsereka Têgêrayîşê Cinîyan ê Kurdan ê Ewropa Aytene Kaplan şar selam kerd. Qiseykerdişan bale ameye antene tecrîdê serê Rayberê Şarê Kurdî Abdullah Ocalanî û hêrişanê vera Kurdîstanî ser û azadîya  Ocalanî û Kurdîstanî ameye waştene.

Hemserekê KCDyî  û Wekîlê Partîya Çep a Keske yê Amedî Berdan Ozturk tewrê festîvale bi. Ozturkî şar selam kerd û nê vatî: ''Pêkerdişê Lozanî 100 serrê xo kerdî de.  Şarê kurdî çar parçeyanê Kurdîstanî de semedê nasname û kulturê xo payan ser o. Rixmê heme qirkerdişan sereberz payra yo û stutuyê  xo wazeno. Dewletê ke Pêkerdişê Lozanî ra paştî genê tecrîdê serê Rayberê Şarê Kurdî Abdullah Ocalanî xorî kenê. Bi nê tecrîdî wazenê îradeyê kurdan teslîm bigerê û kurdan yewna seserre bêstatu biverdê. La ma kurdî semedê statuyî qerardar ê.

CPT û Konseya Ewropa vera tecrîdî bêveng ê, ganî ma vera na bêvengîye têkoşînê xo xurtêr bikerê. Ganî ma vera asîmîlasyonî ziwan û kulturê xo bipawê. Ma ziwanê xo cuyeya xo ya rojane de bişuxulnê.  Cuya bi kurd û kurkî rind a. Eke ziwanê ma çîn bibo, tarîx, kultur her çîyê ma çîn beno.  Ganî her kes verî domananê xo kurdkî bimusno.''

Avûkatê Rayberê Şarê Kurdî Abdullah Ocalanî Omer Guneş û Mahmut Şakar zî vejîyayî sehneyî ser û qala rewşa huqûqî ya Ocalanî kerde.

Badê qiseykerdişan panc çalakwanê 'Rayraşîyayîşê Azadîye' yo ke semedê azadîya fîzîkîye ya Abdullah Ocalanî bajarê Dortmundî ra heta Kolnî ame kerdene, qisey kerd.