Endamê Partîya Komunîst a Fransa (PCF) Gontardo ke hetkarê serekê Komîsyonê Averberdiş û Awanîsazî yê Senatoyî yo, heman wextî de endamê Koma Komunîste, Komarperwer, Ekolojîst û Hemwelatijan (CRCE) yo ke xeylî partîyanê çepî ra yena pê.

Paştî Daye Xoverdayîşî

Gontardî mektûba xo de da zanayene ke xoverdayîşê hemverê tecrîdî ‘tewirêko cesûr’ o. Senatorê Fransayijî Guillaume Gontardî bale ante serê mektûba çalakwanan a ke 19’ê Sibate de ê rê amebi şirawitene û ard vîrî ke hetê sîyasîyî ra ê Ferhat Encuyî rê wayîr vejênê ke parlamenteranê tepişteyan ra yew o. Gontardî ard ziwan bala ê problemê Kurdan ser o ya û ê mucadeleyê averperwerî yê HDP’yî dir ê ke Tirkîya de yeno dayene. Gontard vat o paştî dano xoverdayîşê grevê vêşanîye yê Strasbourgî ke 17’ê Kanûne ra nata dewam keno.

Senatorê Fransayijî vat, “Ez wazena paştdayîşê xo pêşkêşê nê însîyatîfê şima yê çetinî bikerî ke seba azadîya şarê xo bi mîlîtanî û bi ewtarayîşî têgêrenê.”

Veng Da Cimatê Mîyanneteweyîyî ke ‘Bikewo Mîyanê Têgêrayîşî’

Guillaume Gontardî seba cimatê mîyanneteweyîyî vat, “Binpaykerdişê heqanê şarê Kurdî ê bingeyênî ganî biqedîyê. Cimato mîyanneteweyî seba pawitişê peymananê mîyanneteweyîyan, ganî tedbîranê lezgînan bigêro.”

Hukmatanê Fransa û Ewropa rê Vengdayîş

Gontardî bale ante serê rolo ke Fransa û welatê bînî yê Ewropa eşkenê serê dewleta Tîrkî de kay bikerê û vat hêrişê hmeverê şarê Kurdî yê Tirkîya û perçeyanê bînan ê Kurdistanî ganî vinderê.