Bi wesîleya serrgêra Erdlerzê 6ê Sibate xeylêk şaristanan de merasîmê yadkerdişî ameyî kerdene.

Riha 

Platformê Kede û Demokrasîyî yê Riha bi wesîleya serrgêra erdlerzî Merkezê Karî yê Ahmet Bahçivanî de, qezaya Halîlîye de eşkerayîye daye.  Hemserekê SESî yê Riha Ferhat Demîrî eşkerayîye wende. Eşkerayîye de ame dîyakerdene ke sebebê nê felaketî peygoşîya îqtîdarê AKP-MHPyî ya. Hemserekê DEM Partî yê Riha Bekîr Karakeçîlîyî eşkerayîye de qisey kerd û vat ke ê do hesabê nê erdlerzî îqtîdarî ra bipersê. 

Hatay

KESKî verê Nêweşxaneyê Dewlete yê Îskenderunî de eşkerayîye daye ke tede 80 kesan dinyaya xo bedilnabî. Endamê MYKyî yê Keskî Erdal Karakuşî û Hemsereka SESî ya Îskenderunî Nalane Nacar qisey kerd û îfade kerd ke rixmê raporê 'seba erdlerzî saxlem nîyo' nêweşxane de tedbîrêk nêameyo girewtene. Dima girseyî qerenfîlî verê nêweşxaneyî de nayî ro.

Adana

Baroyê Adana Salona Edlîyeya Adana de merasîmê yadkerdişî serûber kerd. Dima zî Heyetê Îdareyê Rayberdişî yê Odaya Muhendîsan eşkerayîye daye. Eşkerayîye de venga îqtîdarî dîya ke peynîya polîtîkayanê rantî bîyaro.

Amed

Verê Dîyar Galerîa ya qezaya Bajarê Nû ya Amedî de merasîmê yadkerdişî ame kerdene. Namzetê Şaredarîya Amedî yê DEM Partî Serra Bucak û Dogan Hatun zî tewrê yadkerdişî bîyî. VerêGalerîa de qeranfîlî nîyayî ro û duayî ameyî wendene.

Dima Goristanê Yenîkoyî de Melîke Alpa ke Dîyar Galerîa de dinyaya xo bedilnabî serkêşîya TJA de ameye yadkerdene. TJA eşkerayîya xo de vat ke cinîyî do bi ruhê bawerî û paştdayîşî cuya newîye awan bikerê. 

Platformê Pawitişê Şaristanî û Paştdayîşî yê Amedî û Odaya Bazirganan û Sanayî ya Amedî (DTSO) zî eşkerayîye daye. Eşkerayîye de dîya zanayene ke Amed de erdlerz de 414 kesan dinyaya bedilnaya û 6 hezar û 77 bînayî texrîb bîyê.

Dêrsim, Çewlîg, Îzmîr, Îstanbul û Êlih de zî qurbanî bi eşkerayîyan û merasîman ameyî yadkerdene.