Kombîyayîşê Heyetê Pêroyî yê 18. yê Kongreya Neteweyîye ya Kurdîstanî (KNK) rojanê vîyarteyan de Hollanda de ame viraştene. Çar perçeyê Kurdistanî ra temsîlkarê partîyanê sîyasîyan, dezgeyan û îtîqatan tewrê ci bîyî. Îdarekaranê Partîya Yewîya Kurdîstanî (YNK) ra Bilêse Cebar Fermane û temsîlkaranê Kurdan ê Zerdeştî ra  Pîr Lokman bele ante muhîya yewîya neteweyîye ser.

Îdarekranê YNKyî ra Bilêse Cebar Fermane waşt ke wa heme partîyê kurdan binê serbanê KNKyî de bêrî pêser û va:‘‘Ma sey kurdan hewceyê yewîye yî. Partîyê Kurdan ganî semedê yewîye  nuqteyêk a hempare de bêrî têhet. Fikrê ma çend cîya bê zî semedê azadîya kurdan ganî ma pero pîya têbigêrê. Tena bi mucadeleyê çekinî ma nêresenî cayêk. Semedê dewaya Kurdîstanî sere de  parlamento ganî ma her ca de mucadeleyî xurt bikerê.‘‘

GANÎ HEME PARTÎYÊ KURDAN KNK DE BÊRÎ TÊHET

Fermane qiseykerdişê xo rê wina dewam kerd: ‘‘Semedê yewîya neteweyîye KNK dezgehêko sembol o.  Rixmê heme cîyayîyanê ma qe yew partî ganî partîya bîne xirab ramemojno. Ganî aştî û dîyalogê zereyî esas bêro girewtene. Waştişê ma pêrune azadîya Kurdîstanî ya. Semedê naye ganî ma yew bê.‘‘

Pîr Lokmanî zî da zanayene ke Kurdê Zerdeştî  reya verên a ke tewrê kombîyayîşê KNKyî benî, naye rê keyfweşîya xo arde ziwan û va:‘‘ No kombîyayîş ke semedê yewbîyayîşê kurdan ame viraştene, çîyêko zaf muhîm o. Çar leteyê Kurdîstanî ra temslîkarê ke ameyî têhet meseleyî û peşnîyazê çareyî ser o qisey kerd. Semedê yewbîyayîşê kurdan ma heme hemfîkîr î. O wext ganî ma goreyê naye têbigêrî. Semedê caardişê aştîya zereyî û cuyaya hempare ganî partî û dezgehê Kurdîstanî hêzê xo bikerî yew. Ma ganî demêko kilm de hindî Kongreya Neteweyî virazê.‘‘