Seyîd Riza û embazê ci yê ke 15ê teşrîna peyêne ya 1937î de Xarpêt de ameybî dardekerdene, şaristanê Baselî yê Swîsre de bi merasîmêkî ameyî yadkerdene.  Merasîm Merkezê Kulturê Elewîyan ê Baselî de ame kerdene. 

Merasîmî bi deqayêkê rêzgirewtişî dest pêkerd û şexsê Seyîd Riza û embazanê ci de seba qurbananê Terteleyê Dêrsimî findî ameyî tavistene. Dima derheqê terteleyî de belgefîlmêk ame mojnayene.

Temsîlkaranê Merkezê Kulturê Elewîyan Hîdayete Ok û Musa Mutluyî merasîm de qisey kerd. Qiseykerdoxan vist vîrî ke waştişê Seyîd Rizayî yo peyên nêameyo caardene û bale ante hêrişanê qirkerdişî yê 100 serranê dewleta tirke ser.

Dima Pîr Seyîd Erdoganî gulbang wend û loqmayî ameyî vilakerdene.