Partîya Demokratîke ya Şaran (HDP) çend rojî verê cû Anqara de kongreya xo ya tabîyî ya 4. bi tewrbîyayîşêkê xurtî kerde. Hemsereka HDPyî ya Anqara Perîhane Sînemîloglu derheqê kongre de qisey kerd û vat ke rîxmê pêro tedayan zî şar bi hawayêkê xurtî tewrê kongre bi û înan kongreyêka bêhempa kerde.

Kongre ra dima zaf kesî ameyî destbendkerdene. Perîhane Sînemîloglu bale ante naye ser û vat: ''Kongre seba îqtîdarî mesajêko pîl bîye. Peyî ra Devlet Bahçelî ma kerdî hedef. Tehqîqatan dest pêkerd. Her gama ma bena semedê tehqîqatan. La ma tedayan ra tewr nêtersayî û ma do tira nêtersê. Ma rastîyan vanê. Ewro çîyê ke Îdlîb de benê zî wina yê. Êyê ke vizêr tezkere tesdîq kerd nika vanê 'Şerî rê ney, ma bivejîyê kuçeyan.' Ma vizêr zî heman çi vat û ma nika zî ey vanê.'' 

'8ê Adare de ma do meydanan de bibê'

Perîhane Sînemîloglu derheqê xebate û amadekarîya 8ê Adare ya HDPyî de vat: ''Ma dest pêkerd. Verê ma de 8ê Adare, Newroz û 1ê Gulane estê. 8ê Adare de ma do bi rengê Platformê Cinîyan ê Anqara tewrê çalakîyan bibê.  Ma do fîlman bimojnê, xebetanê dovîzî bikerê. Par rîxmê teda û destbendkerdişan zî ma meydanî pirr kerdbî. Ma do emser zî şertî se bibê zî bivejîyê meydanan û kuçeyan.''