Sîyasetmedaran veng da Almanya

Zîyaretê Erdoganî yê Almanya ke do siba dest pêbikero ver reaksîyonî her ke şono zêde benî. Parlamenterê HDPyî ke surgun de yî, veng dayî Almanya ke wa zîyaret de qala neheqî û bêhuqûqîyan bêro kerdene.

Sîyasetmedarê HDPyî ke surgun de yî, zîyaretê Erdoganî yê 3 rojan yê Almanya ra ver, îzehetêko nuştekî dayî. Sîyasetmedaran vato ‘no zîyaret bi dawetê Almanya beno’ û dîyar kerdo ke no zîyaret seba meşrûkerdişê krîzê ekonomîke yê Tirkîya û meşrûkerdişê Erdoganî yeno kerdene.

Sîyasetmedaran dewamê îzehetê xo de vato ‘prosesêko winasî de Almanya mesajê wayîrvejîyayîşê Erdoganî dana û no zî merdimî dano fikîryayene’ û wina vatî: “Şima sebebanê raştî yê krîzê ekonomîke û sîyasî ser o nêvindenî.”

WA ZIRAR NÊDO RUHÊ AŞTÎ Û AZADÎYE YÊ EWROPA

HDPyîyan dayo vîr ke Erdogan seba îqtîdarê xo Tirkîya û Rojhelato Mîyanên de şerî domneno û bi no hawa veng dayo hukmatê Merkele:

“Tirkîya de nika bi hawayo fîîlî OHALêk esto, parlamenter, şaredar, rojnameger, roşnvîr û sewbîna zîndanan de yî. Pêvînayîşo ke nînan nêgiro rojeva xo û sewbîna çîyan ser o vindero, o wext do wijdanê şaran de bêro mehkûm kerdene.

Ganî Almanya goreyê menfîetanê xo yê ekonomîkan nê, çarçewaya heqanê unîversalan de hereket bikero. Erdogan menfîetê xo û partîya xo sey menfîetê Tirkîya nîşan dano. No xapênayîş o. Ganî îdarekarê Almanya nêyî bivînî. Eke wina nêbo, Almanya zî do nê kerdişan ra berpirsîyar bo.

Eke Almanya Erdoganî reyde tayê peymanan bikero, o wext no do tena zirar nêdo Almanya. Do zirar bido ruhê aştî û azadîye yê Ewropa zî. Ma wazenî ke wa hukmatê Almanya nînan bivîno û goreyê ci hereket bikero.”

Kesê ke îmze eştî îzehetî nê yî:

Ahmet Yildirim (Parlamenter), Besîme Konca (Parlamenter), Burhan Kocaman (Hemserekê Şaredarîya Depî), Dîlek Ocalane (Parlamenter), Faysal Sariyildiz (Parlamenter), Fîlîz Koçalî (Îdarekara Partîye), Hatîp Dîcle (Hemserekê KCDyî yê verên), Hasîp Kaplan (Parlamenter), Hasan Basrî Firat (Hemserekê Şaredarîya Xinûsî), Huseyîn Guneş (Hemserekê Şaredarîya Gimgimî), Leyla Bîrlîke (Parlamenter), Leyla Îmrete (Hemsereka Şaredarîya Cizîrî), Lezgîn Botan (Parlamenter), Nursel Aydogane (Parlamenter), Orhan Şansal (Hemserekê Şaredarîya Pirsûsî), Sîbel Yîgîtalpe (Parlamenter), Sînan Onal (Temsîlkarê HDPyî yê Almanya), Tuba Hezer (Parlamenter), Zîya Pîr (Parlamenter).