Serra 2016î de seba ke kolonê awanîyî birnaybî, Arîf Samî Rendeyî rê ke wayîrê şîrketa awanîyan o, dewa ameybî akerdene la dima dewa de qerarê ‘netaqîbkerdiş’ ame dayene.Vejîya meydan ke awanîyê ke ey viraştî û sey rezîdansanî rotî, nê awanîyî zî erdlerzî de serûbin bîyî. Nîhat Sonmezo ke bira û birazayê ci binê xirban de mendê, 13 rojî yê ke wazeno meyîtanê xo bivejo. Seba talûkeyê rijîyayîşî tîmê xelisnayîşî nêwazenê nê xirban ser o bixebitîyê.

Sonmezî da zanayene ke, a awanî par ameya viraştene û hîrê qatê aye yê binênî rijîyayî û bira û birazayê ci zî binê ê xirban de mendî. Û seba ke talûkeyê rijîyayîşê qatanê bînan est o, ekîbî nêwazenê na xirbe ser o xebate bikerê û vat, ‘‘Ekîba zerrîwaze yê Konyayî meyîtê birakênaya ey binê xirban ra vete û eke ekîbî rew ameyêne xirban ser o birakênaya mi nika weş bîyêne. Çunke wexto ke ma meyîtê aye vet newe rehmet kerdbî. Meyîtê aye ra boye nêameyêne.’’

Sonmezî dîyar kerd ke kepçeyî nêameyî û tîmê xelisnayîşî zî nêwazenê na xirbe de bixebitîyê. Tena waştişêkê mi est o ke ez wazena meyîtê bira û birazayê xo biveja. Cenazeyê ma ma ra asenê la kes nêyeno nêvejeno.’’