Hatay de roja çarin a erdlerzî de bi ameyîşê hêzanê çekdaran ê dewleta tirke serebûtê dizdîye û talanî zêdîyayî. Reyna cehdkerdişê provokasyonî yê  polîsan yê vera dezgehanê şorişgêr û welatperweran zî zêdîyayî.

Hêzê dewleta tirke  wazenê Hatay de mabênê şarî û hêzanê şorişgêr û welatperan ê ke roja verêne a erdlerzî ra paştî danê mexdûranê erdlerzî, bixeripnê. Hêzê dewleta tirke seba ke serebûtanê dîzdîyê bierzê milê şorişgêran, şewe gama ke şar rakewtene, herêmanê hetkarî yê ke  hetê şorişgêran ameyî roneyene ra, waşt ke verbendikanê şorişgêran bidiznê.

Şorişgêranê ke ANFyî rê qisey kerd, vat: ''Nê cehdkerdişê dîzdîye ke çend rey ame kerdene de, kesêk ame tepiştene û kuwayene. Dima ra no kes rema şi cayê polîsan. Polîsan o pawit û bi vatişê, 'şima hêrişê polîsan kenê' vera şorişgêran nêrazîbîyayîş mojna. Roja bînî kesêk ame vat şima rind gureyene, verbendikêk bidê ez zî şima reyde  bigurîye. Ma biney şîyî ey ser, reyna polîsî ameyî o berd. Wazenê ke bi nê verbendikanê ma dizdîye bikerî û şorişgêran sûcdar bikerê ke wa mabenê şorişgêran û şarî abibo.''

Hetê bînî ra dezgehê ke nêzdîyê AKPyî yê bi waştişê xirab mojnayîşê şoirşgêran, mîyanê şarî de vanê 'ê terorîs ê hetkarîya înan megerê.'

Hatay de dewleta tirke ya ke roja çarine verî bi ameyîşê leşkeran xo mojna, roja bîne polîsê TEMî û ajanê MÎTî şawitî bajar. Bajar de nika eşkera yeno vînayene ke senî zaf polîs û ajanî est ê. polîsê TEMî û ajanê MÎTî bitaybetî nêzîyê waranê ke şorişgêr û welatperwerî de hetkarî vila kenê de ameyî cakerdene. Nê kesê ke kuçeyan de bi wesayîtanê sîvîlan gêrenê, bitaybetê waranê şorişgêran de kesê ke hetkarî vila kenê, înan teqîp kenê, nasname persenê û bi destbendkerdişî tehdît kenê.

Komel û weqîfê ke bi nêzîbîyayîşê AKP-MHPyî yenê naskerdene,roja hîrêne kewtî bajar. Teberê înan de Komeleya Tirkanê Ahiska  û Weqfê Fetîhlerî yê ke pabesteyê MÎTî yê, ê zî bale ancenê xo ser ke xeymanê AFADî yê ke nêdîyayî şarî de manenê û leşkerî înan rê hetkarî kenê. Reyna kesê ke bi verbendikanê Weqfê Dîyanetî bajar de gêrenê, ferman danê polîsan.