Parlamenterê HDPyî yê Wanî Murat Sarisaçî ke xeylêk warê erdlerzî yê  Mereş û Hatayî zîyaret kerdî, qala rewşa nê cayan kerde.

Sarisaçî bale ante ser ke erdlerzî ra dima çîyê ke hewce kerdêne, nêameye kerdene û vat, ‘‘Bazarcix, Elbîstan, Mereş û sewbîna herêmanê erdlerzî ra ma vînenê ke dewlete şarî binê xirban de verda. Seba ke, 24 saetî yê erdlerzî zaf muhîm bî û çi heyf ke heta roja 3yinî zî şar binê xirban de bi îmkananê xo hewl dayêne ke merdimanê xo bixelisno. Dewlete nêameye, dewlete uca de çin bîye.’’

Eşkera bîye ke polîtîkayê şerî ra vêşêr qet polîtîkayêke çin a

 Murat Sarisaçî vat, ‘‘Gelekî baş vejîya meydan ke potîtîkayê şerî ra vêşêr seba ciwîyayîşê şarê xo qet polîtîkayêka xo ya bîne çin a. Mexdûrîyetîyêka xeylî gird est a. Erdlerz qedîya la şar teber de û serdan ver de yo.’’

Bi astengkerdişî ferz kenê ke şarî koçber bikerê

Sarisaçî ard vîrardene ke giranîya erdlerzî Kurdîstanî de qewmîya û dewlete zî hewl dana ke erdlerzî seba xo bixebitna û vat, ‘‘No erdlerz Bazarcix û cayanê bînan de bi  sebebê koçberîye. Hema zî hemverê ney de tedbîrêk çin o. Seba ke tîya de çadirî çin ê, werd çin o, seba nêweş û kokiman derman çin o, şar mecbûr maneno ke koçê cayanê bînan bikero. Dewlete herinda ke tedbîran bigîra seba hetkarîye zî asteng bena. Ma bawer kenê ke nê polîtîkayî seba koçberkerdişê şarê kurd û yê elewîyan o.’’