Goreyê agahîyan bi beşdarîya Serek Lars Klingbeilî heyetêkê SPDyî Merkezê Pêroyî yê DEM Partî zîyaret kerd.

Heyet hetê Hemserekê Pêroyî yê DEM Partî Tuncer Bakirhan, Hetkara Hemserekan Ebruye Gunay, Wekîlan Saruhan Oluç û Ceylane Akça Cupolu ra ame pêşwazîkerdene.

Pêvînayîş de meseleyê Tirkîya, Rojhelatê Mîyanênî û dinya, rewşa sîyasîye ameyî nîqaşkerdene.

Bakirhanî bale ante hêrişanê vera DEM Partî ser û dîyar kerd ke rixmê ney zî DEM Partî seba demokrasî, azadî û têdûştîye têkoşîn kena.

Klingbeilî ard ziwan ke hayîya nînan bi hêrişanê vera DEM Partî est a û îfade kerd ke DEM Partî seba demokrasîyê Tirkîya wayîra cayêkê girîngî ya.

Klingbeilî vat: ''Rixmê hêriş û tedayan zî şima weçînayîşan de serkewtiş vist destî. La rixmê ney zî tayînkerdişê qeyûman raşt nîyo. Îdareyê herêmîyî seba demokrasîyî şert ê.''