Aktîvîteya Stockholmî de beyraqê PKKyî, portreyê rayberê şarê Kurdî Abdullah Ocalanî û pankartê ke waştişanê azadîya şarê Kurdî û demokrasî anê ziwan ameyî aliqnayene. Latîf Cebeyî yo ke bi nameyê Komîsyonê Keyeyê Şehîdan qisey kerd “Roşanê Ganebîyayîşî” ro rayberê şarê Kurdî Abdullah Ocalanî, heme tepişteyan û şarê Kurdî pîroz kerd.  

PKKYÎ HÊZÊ XO TIM ŞARÊ KURDÎ RA GIREWT

Cebeyî vat: “Kurdistan de nika prosesêko zehmet yeno ciwîyayene. Dewleta Tirkî seba raşterawedartişê destkewteyanê Kurdan bi heme hawayî hêrişan kena.”

Girin Kasirga ke bi nameyê organîzasyonanê komelê sivîlî yê Kurdistanîyan qisey kerd vat: “PKKyî şarê Kurdî hurzna payan ser. Mucadeleyê PKKyî tenya Kurdan ser o nê, heme şaranê Mezopotamya ser o tesîr kerd. PKK raştîya şaran o, raştîya cewherê cinîyan o.”

Çalakîye de sînevîzyonêk ke tede mesajê hemserekê Konseya Rayberdişî ya KCKyî Cemîl Bayikî estbi ame ramotene.

SEBA PAWITIŞÊ DESTKEWTEYAN YEWÎYA NETEWEYÎYE ŞERT A

Xeylî partî û organîzasyonê komelê sivîlî zî tewrê şayî bî. Temsîlkarê KNKyî yê Swêdî Ahmet Karamuş yo ke tewrê şayî bibi ANFyî rê qisey kerd û nê vatî: “Destkewteyê şarê Kurdî estê. Nê destkewteyî bi xatirê cuya bi hezaran şerwanan û fedakarîyanê pîlan virazîyayî. Ewro hemverê şarê ma de hêrişî estê, destkewteyê ma binê gefî de yê. Ma ma stratejîyêka hempare eşkenê nê gefan ra xo bixelesnê.”

Temsîlkarê TEV-DEMî hunermend Armancî zî wina vat: “PKKyî bi mucadeleyê xo yê hende serran ramot ke çar perçeyanê Kurdistanî zî temsîl kena. Ewro rîyê hêriş û zextanê dewleta Tirkî ra hunermendê Kurdan nêeşkenê hunerê xo tam bica biyarê, zehmetîyan ancenê.”

Şayî de hunermendê sey Seyda Perînçek, Dilşah, Evîn, Girîn û Gursel Dayanî zî ca girewt û bi deyîranê xo reng da şayî.

TORÎNO Û SYDNEY DE ZÎ AWANBÎYAYÎŞÊ PKKYÎ AME PIROZKERDENE

Şaristanê Îtalya Torîno de serragêrayîşê PKKyî yo 40. bi aktîvîteyêk ke salonêk de amî viraştene ame pîrozkerdene. Şayî de mesajê Komîteya Hadreyîye ame wendene. Dima ra zî ramojîyayîşêkê sînevîzyonî yê derheqê PKKyî ame viraştene.

Şayîyêka bîne zî şaristanê Awusturalya Sydney de amî viraştene. Şayîya ke Merkezê Komelê Kurdan ê Demokratîkî de amî viraştene, hemserekê merkezî Brusk Alverî qisey kerd û vat ke PKK newe ra ganebîyayîşê şarê Kurdî îfade keno. Sewbîna sîyasetkaro Kurd Cemîl Gultekîn û hemsereka merkezî ya bîne Necla Çîya zî derheqê muhîmîya mucadeleyê PKKyî û rolê ci yê azadîya cinî de qisey kerd.