Ewropa de destsernayîşê şaredarîyanê HDPyî pê tay çalakîyan  ameyî protestokerdene.

Touluose

Şaristanê Touluose yê Fransa de aktîvîstanê Têgêrayîşê Ciwanan ê Şorişgêran û Cinîyan ê Ciwanan ê Azadan (JCA) hetê îqtîdarê AKP-MHPyî ra destsernayîşê şaredarîyanê HDPyî protesto kerdî. Çalakîye de pankartê bi nuşteyê ''Erdoganê dîktatorî vindarnê'', ''Qeyûm rejîmê darbe yo'' û ''Dest mede îradeyê ma'' ameyî akerdene.

Strasbourg

Şaristanê Strasbourgî yê Fransa de zî aktîvîstanê TCŞ û JCA çarçewa hemleya ''Meverde'' de rayraşîyayîşêk kerd. Rayraşîyayîş de pankarta bi nuşteyê ''Vera faşîzmê tirkan sere wedare'' ameye akerdene. Rayraşîyayîş de posterê Rayberê Şarê Kurdî Abdullah Ocalanî û alaya PKKyî ameyî kiriştene û sloganê ''Faşîst Erdogan'' û ''Ocalanî rê Azadîye'' ameyî vatene.

Drancy

Banlîyoyê Drancyî yê şaristanê Parisî yê Fransa de zî destsernayîşê şaredarîyanê HDPyî pê rayraşîyayîşêk ame protestokerdene. Ciwananê ke pankarta ''Erdogan Kurdîstanî ra def be'' kirştêne sloganê ''Bêserek cuye nêbena'' û ''Faşîst TC Kurdîstanî ra def be'' vatî.

Stuttgart

Şaristanê Stuttgartî yê Almanya de zî pankartê bi nuşteyê ''Vîrusê Erdoganî Kurdîstanî ra def be'' û ''Ma pîya Qendîl bipawê'' ameyî daliqnayene.

Bern

Hetê bînî ra TCŞ û Women Defend Rojava Daristanê Şehîdan ê Enternasyonalîstan ê Şorişê Rojawanî yê Saint Imierî yê şaristanê Bernî yê Swîsre de şehîdê menga gulane yad kerdî.

Merasîmê yadkerdişî pê deqayêkê rêzgirewtişî dest pêkerd û aktîvîstêkê TCŞyî pê qiseykerdişêş şehîdî yad kerdî. Aktîvîstêka Women Defend Rojava û ciwananê enternasyonalîstan qala şerwananê YPG û YPJyî kerde ke prosesê Rojawanî de ê şinasnayî.

Merasîmê yadkerdişî pê goştarîkerdişê muzîkî qedîya.