Rojnamger-nûştox Fehîm Işik bawer keno ke krîzê S-400’î, têkilîya ke do serê Rûsya û Sûrîye ra bêro ronayene açarno eleyhîyê Erdoganî. La bawer keno ke pozîsyono ke DYA û welatê rojawanijî do bigêrê zî muhîm o. Hêzo ke esil bi Erdoganî bido vînîkerdene zî sere de şaro Kurd, şarê Tirkîya yê ke ê û partîya ê politikaya zereyî de fînayê halêkê xirabî mîyan.

Ma Fehîm Işikî dir derheqê polîtîkaya Sûrîye ya ke vuraya, peyamê Ocalanî de baleantişê serê Sûrîye û operasyonêkê muhtemeli yê hemverê Îranî de qisey kerd.

DYA û Rojawan Hewna zî Erdoganî ra Umîdwar ê

Fehîm Işikî wina qisey kerd:

“Cehdê Tirkîya yê herînayîşê fuzeyanê S-400’an, berhemêkê têkilîyanê mabênê Rûsya û Tirkîya yo ke dimayê krîzê Sûrîye ra vejîyayî werte. Her çend DYA û NATO cehdê Tirkîya yê herînayîşê fuzeyanê S-400’an ser o bi cidîyet vindero zî bawer kenê ke Tirkîya do hende bi asanî sîstemê xo yê pawitişî yo ke pabesteyê NATO’yî yo nêeşko bivurno. Tirkîya zî zana ke şertê ci yê ke nê bica bîyaro çinê. DYA û Rojawano ke hewna zî umîdê xo Erdoganî ra nêbirnayo seba ke îdareyê Tirkîya bi temamî mekerê vînî seba dayîşê wextî to opsîyono ke lazim o pêşkêş bikero.

Pûtîn û Erdogan do Bêrê Hemverê Yewbînan

Hemleya S-400 ya Tirkîya yena manaya xurtkerdişê têkilîyanê mabênê Rûsya û Tirkîya, la ez bawer kena ke qetîyen do no peynî de agêro eleyhîya Erdoganî. Pûtîn seba ke meterîsê NATO’yî perçe bikero Erdogan zaf rind şuxulna. Erdoganî zî babeta hemverîya xo ya Kurdanê Sûrîye de îmkanê Pûtînî seba xo şuxulnayî. Labelê tewiro rast ê Kurdanê Sûrîye do Tirkîya û Rûsya, yanî Erdogan û Pûtînî axir bîyaro hemverê yewbînan. Rixmê nê heme îhtîmalan de ganî kes bizano ke çîyo ke esil do bitesîr bo qewimîyayîşê sîyasetê zereyî yê Tirkîya yê. Bi vatişêna nuqtaya ke esil do peynîya îqtîdarê Erdoganî bîyaro tewirê şaranê Tirkîya û hêzanê demokrasî yo.

Rew Yan zî Erey Tirkîya do Efrînî Terk Bikero

Kombîyayîşê Astana ramot ke rejîmê Sûrîye çîyo ke Tirkîya ra waştêne bi dest nêfîna. Naye ra operasyonê hemverê Îdlibî dest pêkerd û çende şiro do hîna bibo çetin. Gureyo ke Rûsya dayo Erdoganî tebervetişê çeteyan Îdlib ra yo û ê herêman teslîmkerdişê rejîmî yo. Yew sebebo ke Efrîn hetê Rûsya ra sey ruşwetî dîya Erdoganî zî no yo. Dore do bêro Efrînî helbet. Belkî ma seba wextêkê kilmekî nêeşkê çîyêk vajê labelê wextêk ke do zaf derg nêbo de dewleta Tirkî ya îşxalkare do mecbûr bimano ke Efrînî terk bikero. Na babete de vernîya Tirkîya de yewna opsîyonî çinê.

Erdogan do Kamcîn Gaman Bierzo Mûhîm o

Ez bawer kena sebebê prosesê çareserîye yê 2013’î zî û dima ra xerepnayîşê prosesî û xurtkerdişî şerî krîzê Sûrîye dir eleqedar o. Mektûba ke birêz Ocalanî pîya bi hemrayanê xo yê tepişteyan Îmrali de nûştebî û 6’ê Gulane de rayapêroyîye dir ameye parekerdene ra zî fam beno ke xeta sûre ya derheqê Vakur û Rojakewtena Sûrîye hewna dewam kena. Yanî sey îdîaya medyaya AKP’yî yan zî tayê dormeyanê ke nêwazenê hetê eslî yê nê çîyî bivînê tena ewnîyayîşêk ke xo menfaatanê Tirkîya ser o awan kerdo çino, ekse ci de menfaatê hemparî, vurayîşo demokratîk, waştişê dîyalogî û muzakereyan mektûbe de serdest o.

Mektûbe ra dima hem reflekse ke hetê îdareyê KCK’yî ra, hem zî hetê îdareyê Vakur û Rojakewtena Sûrîye ra ramojîyayî nê hetî ser o bî. Naye ra heto ke ganî ma bi baldarî bişopnê tena têgêrayîşê Kurdan yan zî îdareyê Vakur û Rojakewtena Sûrîye nê, heman wextî de rejîmê Erdoganî yo zî.

Hemverê Îranî de Viraştişê Operasyonî Muhtemel Nêyo

Ez bawer nêkena ke hemverê Îranî de hereketêko leşkerî bêro kerdene. Tirkîya û Îran wayîrê tecrubeyê îdareyî yê 600-700 serrî yê û dewletê bikok ê. Gama hêzêk biwazo înan bi şer bîyaro xeta xo no do bibo felakete hem Rojakewtena Mîyanêne û hem zî yê dinya. Naye ra rixmê heme tehdîtanê Trumpî de ez îhtîmal nêdana kerdişê operasyonêkê winayênî; ez umîd kena ke nêkero zî. Hetêna ra ganî muxalefetê Îranî, têgêrayîşê sîyasîyî yê Rojakewtena Kurdistanî tecrubeyê bêhempayî yê Sûrîye qetîyen biercnê.