Endamê Heyetê Rayberdişê Merkezî yê DBPyî Faruk Tatliyî derheqê tecrîdê vera Rayberê Şarê Kurdî Abdullah Ocalanî de ANFyî rê qisey kerd.

Tatkiyî ard ziwan ke çarçewa 'Planê Çokdayîşî' de tecrîdê vera Abdullah Ocalanî ame girankerdene û vat: ''Nê planî de têna dewleta tirke nê, aktorê mîyanneteweyî zî est ê. Dewleta tirke bi sereyê xo tecrîdî nêana ca; tecrîd konseptêko mîyanneteweyî yo. Girankerdişê tecrîdî sîyasetê Tirkîya teng kerdo. Wexto ke birêz Ocalanî de pêvînayîş yeno kerdene Tirkîya hetê sîyasî, ekonomîk û komelkî ra bena holêr. Wexto ke merdim ewnîyeno ekonomîya 2015î naye bi asanî vînenoç Coka tecrîdkerdişê Rayberê Şarê Kurdî yeno mana tecrîdkerdişê pêro komelî.''

Tatliyî îfade kerd ke tecrîd çimeyê meseleyanê ekonomîk, sîyasî, komelkî û kulturelan o û vat: ''Cinîyî yenê qetilkerdene, asîmîlasyon û dejenerekerdişo kulturel û exlaqî ciwanan rê yeno ferzkerdene, nê pêro rijîyayîşê komelkî yê ke eleqeyê înan bi tecrîdî est o. Meseleya kurdan çend biba giran meseleyê bînî zî hende benê giranêr. Rayberê Şarê Kurdî seba pêro şaranê Rojhelatê Mîyanênî çareserîyan pêşnîyaz keno. Coka dewletê mîyanneteweyî û dewleta tirke ey tecrîd kenê û xîret kenê ke verê cuyêka aram û asayîye bigêrê.''