Grevê vêşanîye yê bêdem û bêagêrayîşî yo ke endamê AvEG-Kon, SKB û YS’yî hemverê tecrîdî de ACTÎT de domnenê roja xo ya 51’ine de yo. Xoverdayoxî hetê heyetêk ke Têgêrayîşê Aşitîye (Mouvement de la Paix) ra Yves-Jean Gallas tede bi ameyî zîyaretkerdene.

Temsîlkaro ke bi nameyê Têgêrayîşê Aşitîye qisey kerd, vat ganî mucadeleyê azadîye yê Kurdan tena sey mucadeleyêkê bisîlehî nêro dayene û vat, “Ganî kitab û fikrê Ocalanî bi hawayêkê akademîkî bêrê dayîşnaskerdene.”

Gallasî vat, ganî merdim rind biewnîro halê Vakurê Kurdistanî, Rojawan, Sûrîye ra û bi nê hawayî projeyanê cimatkîyan fam bikero û ard ziwan ke bingeyê waştişê Kurdan ê xoserbîyayîşî de çîyo bingeyên bicaameyîşê projeye demokrasî û azadîye yo.

Gama ke Yves-Jean Gallasî grevkerdoxanê xoverdayîşê grevê vêşanîye ra persa şima xo senî hîs kenê persaye, Ozkan Ozdemîrî vat “Ma xo rind hîs kenê. Ma de moral û motîvasyonê xoverdayîşî de bîyayîşî esto. Gama ke dostê ma yenê serdana ma moralê ma hîna beno berz. Ma rincanîya ke netîceyê grevê vêşanîye de vejîyaya werte nê, hîna zaf xoverdayîşanê ke resayê roja 200’ine fikirênê. Înan asta krîtîke rew ra ravêrnaye.”

Xoverdayoxan derheqê xoverdayîşo ke zîndananê Tirkîya û Kurdistanî de dewam keno, binpaykerdişê heqanê merdiman ê Tirkîya û polîtîkayanê zordaran ê îqtîdarî de hayîdarîyî dayî.