Hemserekê Pêroyî yê HDPyî Sezaî Temellî kongreya partîya xo ya Sancaktepe de qisey kerd.
Temellîyî çîyê ke ewro Tirkîya de yenê ciwîyayenê sey faşîzm name kerdî û va: ‘‘Ma qerar girewt ke ma benî yew û nê faşîzmî rijnenî. Ma do her ca de vengê heqîqatî berz bikerê û her kesî tewrê mucadeleyî bikerê û faşîzmî birijnê. Heta ke heme embazê ma azad bî, heta ke heme hemrayê ma yê ke welatê xo ra kewtî dûrî agêrî û heta aşitîye bêro no welat do mucadeleyê ma dewam bikero..‘‘
ŞIMA GANÎ PEYNÎ DE VENGÊ GUVENE BIEŞNAWÎ
Temellîyî grevê vêşanîye yê Guvene zî vîst vîrî û va: ‘‘Çalakîya Guvene kewta roja 32. hema na parlamento û zafê rayapêroyî naye nêvînayîşî ra yenî. Leyla Guvene esta, vengê aye esto, îradeyê aye esto. Peynîya peynî ganî şima zî nê vengî bieşnawî.‘‘
NO TECRÎD GANÎ BÊRO QEDÎNAYENE
Temellîyî qiseykerdişê xo rê wina dewam kerd: ‘‘Rejimê Erdoganî aşitî ra terseno coka kam ke qalê demokrasî û aşitî keno hêrişê înan keno. Sirri Sureyya Onder kewt zîndan. Seba ke cezaya ey esta nê seba ke hetkarê aşitîye yo kewt zîndan. Peynîya nê qewimîyayîşan de fîkrîyato gird yê ma esto. Ma nê fikrîyatî silam kenî, Îmrali silam kenî, Ocalanî silam kenî û ma vanê ke no tecrîd wa biqedîyo.‘‘
MA DO TIRKÎYA ZÎHNÎYETÊ QEYÛMÎ RA BIXELISNÊ
Temellîyî muhîmîya weçînitişanê cayîyan zî arde vîrî û wina domna: ‘‘ 102 şaredarayîyanê ma ra 96. rê qeyûm ame tayînkerdene. Ma nê weçînitişî de do heme şaredarîyanê xo pêser bigêrê û Tirkîya zîhnîyetê qeyûmî ra bixelisnê. Şarê kurdî bi serran o mucadeleyê girdî dano. No tena seba Tirkîya nê seba Rojakewtena mîyanêne zî mucadeleyêko gird yê vurîyayîşî yo. HDP partîya umîdî ya. Ma do bi mucadeleyî aşitî bîyarê nê welatî.‘‘