Wekîlê HDPyî yê Wanî Sezaî Temellîyî menga gulane de şibi Iraq û heyetêk de ca girewtbi. Temellîyî derheqê Qirkerdişê Zaxoyî de ANFyî rê qisey kerd.

Temellîyî îfade kerd ke polîtîkayê şerî serkêşîya Erdoganî de bêmabên dewam kenê û vat: ''Qirkerdişê Zaxoyî bala pêro dinya ante. Xeylêk qirkerdişî yenê kerdene la rejîmê Erdoganî serê înan gêno. La rayaumûmîya Tirkîya û muxalefetê Tirkîya bi hawayêkê qîmî tewirê xo nêmojna nê qirkerdişî. Kesê ke vera polîtîkayanê Erdoganî nêvejîyenê wexto ke raştîye vejîyena werte têna şermezar kenê. No yew serebût bîyo çîyê sîstematîk ê. Ganî ma eşkera bikerê ke nê polîtîkayî vera Kurdîstanî yê. Sûrîye û Iraq de vera Kurdîstanî polîtîkayê hîrakerdişî yenê caardene. Nê netîceyê stratejîya ekonomîk û sîyasî ya îqtîdarî yê. Erdogan seba ke şerî rê dewam bikero ge şino verê berê NATOyî ge şino verê berê Rûsya û Îranî.''

Temellîyî pare kerd ke Iraqî vera hêrişan hêverî nêrazîbîyayîşê xo mojna û vat: ''Gulane de wexto ke ma mîyanê heyetê HDPyî de şibî Iraqî ma serekkomar Berhem Salihî de roniştî. O zî hêrişanê Tirkîya ra aciz bi. Serekwezîrê Iraqî Mistefa Kazimîyî zî hêrişê Zaxoyî ra dima tewirêko zelal mojna. Iraq eşkera keno ke bi seyan dewê înan dîyayî bombayan ver û merdimî ameyî qetilkerdene. Vera PDKyî zî nêrazîbîyayîş zêdîyeno. Eke PDKyî paştî nêdayêne na stratejîya şerî do Tirkîya nêeşkayêne hêrişê herême bikera. Tirkîya alozîya Iraq û Sûrîye ra îstîfade kena. Çareserîya Iraqî çareserîya Surîye ya; çareserîya Sûrîye çareserîya Tirkîya ya. Çareserîye Îmrali de dest pêkena. Çareserîya meseleya kurdan do rayîrê haştîye û demokrasî akena.''