Hemserekê HDPyî Sezaî Temellîyî ard ziwan ke înan dewlete ra waşto ke muzakereyî bi muxateban bêrê kerdene û muxatebî dir ronişê.

Temellîyî derheqê tecrîd, lazimîya bi aşitî û îhtîmalê prosesê muzakereyî yê neweyî de persê ma rê cewab dayî.

ŞERRÊ DIŞMENÎYA KURDAN DE ISRAR

Hemserekê HDPyî Sezaî Temellîyî vat serranê mabênê 2010 û 2013î de bi cehdanê Rayberê Şarê Kurdî Abdullah Ocalanî averşîyayîşê muhîmî bîyî. Temellîyî vat: “Gama ma seva ameyokê Tirkîye û Rojhelatê Mîyanênî muhîmîya aşitî ser o vindertêne, tayê dormeyan zî ‘Planê Raşanayîşî’ viraştê. Ma do mücadeleyê aşitîye rê dewam bikerê, labelê wina aseno ke dewlete şerro ke dişmenîya kurdan ser o awan bîyo ra fek vera nêdayo.”

FAŞÎZM ŞERRÎ SER RA CIWÎYENO

Temellîyî qiseykerdişê xo wina dewam kerd: „Hemverê şerrî de bîyayîş bîyo sûcêk. No rejimo otorîter o, faşîzm xo dezgeh keno. Polîs şarî ser o teror bica ano, dadgerî bîya wesîteyê îqtîdarî. No mekanîzmayê şerrî yo. Tirkîye 2013-2015 de nê firsendî dest ra remna, la ewro ancî eşkena bikewo nê rayîrî ser.“

GANÎ JEOPOLÎTÎKÊ KURDAN BÎGÎRÎYO HESAB

Temellîyî vat: „Halkerdişê probleman de ganî halo jeopolîtîk yê kurdan zî bigîrîyo hesab. Çareserîya demokratîke tenya rojawanê Tirkîye dir eleqedar nêbî. Ganî bingeyê sîstemê komara demokratîke, wetanê hemparî û hemwelatîya seypêye ser o cuyêk biameyêne awankerdene. Heta nê çinêbê do şerro taybet, vatişê nefretî û pêkewtişî dewam bikerê. Meseleyê kurdan meseleyê ma yo hempar o, tenya meseleyê kurdan nêyo. Seva ke no mesele bêro halkerdene ganî fek fehmê îqtîdarî ra bêro veradayene.

BINGEYÊ HEME PROBLEMAN DE MESELEYÊ KURDAN ESTO

Temellîyî qiseykerdişê xo wina dewam kerd: „Tirkîye de bi se hezaran merdiman wareyê xo ra ameyî koçkerdene. Zindanan de bi des hezaran merdimî estê. Bingeyê nê heme probleman de meseleyê kurdan esto. Sebebê ereykewtişê halkerdişê meseleyê kurdan AKP yo. Wextêk ma ameyî nizdê halkerdişî, la AKPyî verê xo nê prosesî ra açarna û ameyokê şaranê Tirkîye eşt hetêk.“

TECRÎD MUXATEBÎ RA MEHRÛM MENDIŞ O

Temellîyî vat: „muxatebê meseleyê kurdan birêz Ocalan o. Tecrîd ancî destpêkerdişê konseptê şerrî yo. Muzakereyî bi muxateban yenê kerdene. Ma zî dewlete ra vanê ke muxatebê ci dir masa de ronişe.“

MESELE TENYA ŞAREDARÎ NÊYA

Peynîya qiseykerdişê xo de Temellîyî vat: „Îdarekarîyê cayîyî tenya qezenckerdişê şaredarîyan nêyo. Amacê ma îradeyê şarî cayê ci ra kiriştişê bi îqtîdarî yo. Ma do fehmê demokratîkî yê zafvengî cayî ra berê îqtîdar. Ma do welatî nê îqtîdarê yewperwerî ra bifeletnê.“