Temellî: Tecrîdê Îmrali bêedaletîya tewr girde yo

Hemserekê Pêroyî yê Partîya Şaran ya Demokratîke (HDP) Sezaî Temellîyî qisey kerd û va ‘Tecrîdî Îmrali no welat de nîşaneyê bêedaletîya tewr girde yo’.

Meclîsê Partîye yê Partîya Demokratîke ya Şaran (HDP) awanîya merkezê pêroyî de kom bi. Kombîyayîş do 2 rojan dewam bikero û averşîyayîşê aktuelan ser o munaqeşe bêro kerdene.

Hemserekê Pêroyî yê HDPyî akerdişê kombîyayîşî de babetanê rojeve ser o qisey kerd.

Temellî bi yadkerdişê sîyasetmedarê kurd Îbrahîm Ayhanî û silamkerdişê parlamentera tewqîfbîyaye Leyla Guvene dest bi qiseykerdişê xo kerd.

ZÎNDANAN DE ÎŞKENCE ESTO

Temellîyî da zanayene ke roniştişê Meclîsî ke Leyla Guvene nêbo de do efû bêro rojeve û wina va: “Zîndanan de îşkence û muameyelê xirabinî estî. No îqtîdar nînan keno. Yê ke nê îşkenceyê vînenî, çarçewaya pêşnîyazê efû de ca nêgênî... Ganî ma TMK ke herkesî keno terorîst, bibedilnî. O wext lazimîye bi qiseykerdişê efûye nêmanena. Eke şima nînan nêkerî, ma do têkoşînê xo bidomnî.”

TECRÎD NÎŞANEYÊ BÊEDALETÎYA TEWR GIRDE YO

Temellîyî qiseykerdişê xo de qala tecrîdo ke Rayberê Şarê Kurdî Abdullah Ocalanî ser o esto, kerd û wina va: “Tecrîdo ke Îmrali de Ocalan rê beno, nîşaneyê bêedaletîye yo. Çend rojî verê Mehkemeya Heqê Merdiman ya Ewropa va ‘muameleyo xirabin çin o’. Labelê tecrîd bi xo muameleyo xirabin o. No qerar nîşan dano ke edalet bîyo bazarê mabênê dewletan.”

ÎDLÎB

Temellîyî rojeva Îdlîbî ser o zî vindet û wina va: “Çareserîya Sûrîye ancax bi şaranê Sûrîye mumkin a. Cok ra ganî hêzê teberî Sûrîye ra bêrî vetene. Yeno vatene ke grûbî vejîyenî, labelê nê grûbî şonî kura? Gelo nê grûbî ver bi Efrîn û Cerablusî şonî, yan do tîya de bimanî? Eke planêko winasî bibo, o wext do problemî hîna zaf gird bibî.”

KRÎZÊ EKONOMÎKE

Temellîyî qiseykerdişê xo de bale ant krîzê ekonomîke ser û wina va: “Krîzo tewr gird, krîzê ekonomîke yo. No tena krîzê ekonomîke nîyo, krîzê sîyasî û îdarekerdişî yo zî. Şima nêşênî bi bedilnayîşê nameyê programî probleman çareser bikerî. Hewl danî bedelê nê krîzî bi şaran bidî dayene. Bankaya Merkezî seba ke erjê dolarî bîyaro war, dolarê xo xerc kerdî. Rewşa ke ma tede yî hende giran a ke ma goşt û xeleyî zî teber ra herînenî. Eke şima daristanan biveşnî û mergeyan zî qedexe bikerî, wina beno. Ma do bedelê nê krîzî nêdî û seba nêyî zî ganî ma herkesî rêxistine bikerî.”

Temellîyî qiseykerdişê xo de prosesê weçînayîşê herêmî ser o zî va ‘îttîfaqî Anqara de nê, eke ziqaq û taxan de bêrî viraştene, o wext manaya xo esto’.