Hemserekê Pêroyî yê Partîya Şaran a Demokratîke (HDP )yî Sezaî Temellî bi heyetêkê îdarekar û parlamenteranê partî ra şi qezaya Cizîrî ya Şirnexî û tewrê kombîyayîşê şarî bi.

Temellîyî bi yadkerdişê Asya Yuksele û Mehmet Tûnçî dest bi qiseykerdişê xo kerd û va: ‘‘Ma çi wext bêrê Cizîr vîrardişê embazan û qerarîya şima ra, ma hêz genî û bi nê hêzî rayîrê xo rê dewam kenî. No rayîrê aştî, demokrasî û azadîye yo. Ma do nê rayîrî ra peyser amegêre.

VENGDAYÎŞÊ MUCADELEYÊ HEMPARÎ

Temellîyî qiseykerdişê xo rê wina dewam kerd: ‘‘Vera polîtîkaya hêrişkare ganî mucadele bêro xurtkerdene. No mucadeleyê aştî û azadîye yo. Na mesla tena kurdan ser o verdayîş û remayîş nêbeno. Ganî heme hetî hêzê xo yew bikerî û vera nê zulmî de vindî. ‘‘

EFRÎN YÊ EFRÎNIJAN O

Temellî herişê Efrînî yê dewleta tirkî zî vist vîrî û wina domna: ‘‘Zîhnîyeto faşîst bi hêrişanê tîyayî qîmê xo nêard, destê xo Rojhelato Mîyanên rê derg kerd. Çeteyê xo kerdî Efrîn cuya şaran ser û bin kerde û nika zî plananê Îdlîbî keno. Wexto ke ma vatêne Efrîn ê Efrînijan a yê ke ma sûcdar kerdêne wa ewro biewnî Efrîn ra. Uca de talan esto, îşkence esto, bazarê cinîyan est o.‘‘

VERA TECRÎDÎ MUCADELE

Temellîyî bale ante muhîmîya rolê Rayberê Şarê Kurdî Abdullah Ocalanî ser û va: ‘‘Ê ke îradeyê nê şarî nêşinasnenî herbî ra xo weye kenî. Înan ke vernîya demê çareserî girewte, palananê çokcidayîşî kenî. Cok ra no welat de tecrîdê Îmralî esto. No semed ra Birêz Ocalanî ser o tecrîd est o. Ma ke mucadeleyê demokrasî danê, wedartişê tecrîdî deynê milê ma yo. No welat, no şar gêreno aştî. Rayîrê aştî zî Îmrali ra vêreno ra. Bêrên nê tecrîdî wedarêne, Fîgen Yuksekdage, Selahattîn Demîrtaşî û Gulten Kişanake ya pîya heme embazenê ma serbest vera bidêne û vernîya demokrasî a bikerê.

ŞARANÊ TIRKÎYA RÊ VENGDAYÎŞ

Temellîyî qiseykerdişê xo wina qedîna: ‘‘ Ma veng danê şaranê Tirkîya. Îqtîdarî ra pawitişê ma çîn o. Îqtîdar helisyayo. Bêrên ma demokrasîya cayîye nika ra bifînê dewre û vernî de qeyûmî heme îdareyanê cayîyan nê zîhnîyetî ra bixelisnê. Ma do xabetê rêxistinkeridşî xurt bikerê, tecrîd bişiknê û rayîrê azadîyan a bikerê.‘‘