Denîz Kayayî bi nameyê tepişteyanê PKK û PAJKî bi eşkerayîyêk qerarê Amerîka yo ke derheqê ronayox û rayberanê PKKyî de girewtibi protesto kerd û vat ê do Sersefîrîyanê Amerîka rê faksanê protestoyî bieşrawê.
Tepişteyanê PKK û PAJKî yê ke zîndananê Tirkîye û herême de yê qerarê Amerîka yê seba tepiştişê Cemîl Bayik, Duran Kalkan û Murat Karayilanî girewtibi reaksîyon ramot. Denîz Kayayî bi nameyê tepişteyan qisey kerd û vat: “Amerîka seba hemrayanê ma Cemîl Bayik, Duran Kalkan û Murat Karayilanî yê ke rayberîyanê PKK, KCK û HPGyî de ca girewto qerarê tepiştişê girewto, kesê ke îxbar bikerê rê zî sozê xelate dayo. Tu hetêkê cimatkî, exlaqî, wijdanî û alemşumûl yê nê tewrê dişmenayî û qerarê sîyasîyî çinyo. No qerar bi temamî goreyê sebebanê îdeolojîk û polîtîkan ameyo girewtene.”
Eşkerayîye de ame vatene ke no qerar bi komploya hemverê rayberê PKKyî Abdullah Ocalanî dir wayîrê amacanê seypêyan o û wina vajîya: “No qeraro bêbinge yê Amerîka perçeyêkê komploya hemverê Rayber Apoyî yo. Komploya serra 1999î bi hêzê fikrî yê Rayber Apoyî yê pîlî û bi mucadeleyê azadîye yê şarê kurdî bi nisbetêkê pîlî veng a amî vetene. Mucadeleyê ma resa merheleya ke sîyasetê rojhelatê mîyanênî ser o tesîr bikero û têkilîya nê qerarî bi na raştîye dir zî esta.”
Peynîya eşkerayîye de Kayayî vat: “Ma şexsê nê hemrayanê xo de anê ziwan ke hêrişê hemverê Têgêrayîşê Azadîye do nêrê qebûlkerdene; do hemverê no hêrişo ke qirkerdişê şarê kurdî xo rê kerdo amac de bêro mucadelekerdene. Ma sey tepişteyê ke zîndanan de yê nê qerarî qebûl nêkenê û ma do Sersefîrîya Amerîka yê Enqereyî rê û Konsolosîyanê Amerîka yê ke Stenbol û Edene de yê, înan rê faksê protestoyî bieşrawê. Hemrayê ma zî eşkenê hûmara 0312 4670019 yê Sersefîrîya Amerîka rê faks bieşrawê.”
