Îdarekarê Cemxaneyê Şehîdanê Gazî yê Komeleya Pîr Sultan Abdalî Eren Odabaş hêrişê Çaglayanî ra dima bi hawayêkê bêhuqûqî amebi tepiştene. Eren Odabaşo ke Zîndanê Sîncanî de tepişîyeno rixmo ke nêweşê kanserî yo ne vera dîyeno ne zî yeno tedawîkerdene.

Cinîya Odabaşî rojnamegere Ozge Kar Odabaş derheqê babete de ANFyî rê qisey kerd. 

Ozge da zanayene ke 6ê sibate de polîsanê tîmanê taybetan eşt keyeyê înan ser û kênaya ci ya 14 menge rê zî çeke anta. Ozge pare kerd ke hema zî travmaya nê serebûtî înan de est a. Ozge vat: ''Sereştiş de polîsan Eren derb kerd û dergûşa mi bi zorî hewn a kerde. Polîsan keyeyê ma serûbin  kerd û Eren çepkî ra kelemçe kerd berd. Nezaret de hêverî ey rê ajanîye ameye teklîfkerdene. Seba ke ey no qebul nêkerd, bi delîlanê sexteyan tepişîya.''

Ozge vist vîrî ke Eren Odabaş 2016 de zî tepişîyabi û îşkenceyanê ê çaxî ra bedenê ci de kanser vejîyayo. Ozge dîyar kerd ke înan muracat kerdo ke seba ke Odabaş tedawî bivîno sewqê Zîndanê Marmara (Sîlîvrî) bibo la murcatê înan nêameyo qebulkerdene. Ozge vat: ''Eren ne yeno sewqkerdene ne zî tedawî beno. Doktoran vatbi ke ganî Eren Fakulteya Tipî ya Çapa ya Îstanbulî de bêro tedawîkerdene.  Ez rewşa Erenî ra qerqilîyena. Eke Eren nêro tedawîkerdene beno ke çepikê ci bêro tirakerdene. Se beno wa bibo ez do seba Erenî têkoşîn bikera.''

Ozge venag rayaumûmîye daye ke derheqê babete de hîsger biba.