Vizêr tepişteyê nêweşî yê bi nameyê Burhan Karatayî yê 67 serrî krîzê zerrî girewt û cuya xo vîndî kerde. Karatay 3 serrî 10 mengî bi ke bi hawayêkê tepişteyî ameyêne muhakemekerdene.

Lajê Karatayî Îsmaîl Karatayî vat ke înan verî seba tehlîyeya ê raporî dosyayan de dayê, rixmê nê raporan de zî nêameyo tehlîyekerdene. Îsmaîlî vat ke pîyê ci 5 mengî verî ro înan gêrayo û vato ke ganî anjîyo bibo la îdareyê zîndanî destûr nêdano ci. Ame vatene ke tepişteyo 67 serre verî zî nêweşîya ci ya  tansîyona berzî estbîya û 4 reyî zî anjîyo bîyo.

Bi pêhesîyayîşê xebera mergî yê Karatayî keyeyê ci seba girewtişê cenaze şi Gîresun. Cenazeya ci do Bazîd de bêro definkerdene.

Karatayo ke verî zî çende reyî amebi tepiştene demêk Şaredarîya Bazîdî de endamê meclîsî bi.