Hemsereka TUAY-DERî ya Amedî Hatice Guneş ard ziwan ke vera tepişteyanê nêweşan binpaykerdişê heqan dewam kenê û vat şertê tecrîdî heme zîndanan de yenê caardene.

Hemsereka TUAY-DERî ya Amedî Hatice Guneşa derheqê rewşa tepişteyanê nêweşan de ANFyî rê qisey kerd, nê vatî:  ''Tedavîkerdişê tepitşeyanê nêweşan yeno astengkerdene. Embazê ma yê nêweşî mergî rê ameyî caverdayene. Çi heyf ke tay embazê ma bi hewayêkê şikdarî hucreyanê xo de merde yenê vînayene.  Polîtîkayê îqîtdarî yê serê tepişteyanê nêweşan çend şino xirabêr benê. Zîndananê tirkan de tepişteyê nêweşî binê tecrîdî de yê. Rîyê tecrîdî ra heqê cuye nêdîyeno tepişteyanê nêweşan. Seba ke nêweşî vera zextanê îdareyê zîndanî de milê xo çewt nêkenê, heqanê xo ra mehrum yenê verdayene. Derman zî nêdîyeno înan.

Gama ke şinê nêweşxane yenê, raştê cigêrayîşê rûtî yenê û hucreyanê yewkesan de yenê tepiştene. Na rewşe prosesê weşbîyayîşê înan zî kena sist. Seba ke dewlete wayîrê nêweşan nêvejîyena, merdimê înan wazenê ke bêrê veradayene ke bi xo mikatê ci bibê. Çi heyf ke herinde veradayîşî de tepişteyî surgunê zîndananê bînan benê. Keyeyî na babete de prosesêkê zaf zehmetî ciwîyenê. Bitaybetî şîyayîş û ameyî de hem madî hem manevî tengayî ancenê. Rayîr de qeza kenê, mirenê. Dewlete bi surgunkerdişê tepişteyan ceza dana keyeyan zî.''