Endama MYKyî ya Komeleya Heqanê Merdiman Nuraye Çevîrmen eşkera kerd ke tedbîrê ke zîndan de vera janê vîrusê Korona ameyî girewtene qîm nîyê û zîndanan de rîsk hema zî dewam keno.

Çevîrmene derheqê babete de ANFyî reyde qisey kerd û vat: ''Destpêkî ra nata pêşnîyaz û hîşyarîyî yenê peygoşkerdene. Zîndanan de tebîrê qîmî nâmeyî girewtene. Wezaretê Edaletî û serdozgerîyî her roje eşkerayîyan danê ke zîndanan de zaf waqayê vîrusî estê.''

Aynure Çevîrmen da zanayene ke gardîyanî maske û lapikî nêxebitnenê, tepişteyî zî nêeşkenê nê hacetan peyda bikerê. Çevîrmene vat: ''Zîndanan de werdê tepişteyan yeno kêmkerdene. Nêno parekerdene ke çend hêzanê asayîşî de zî vîrus ame tesbîtkerdene. Zîndanan de meseleya îzolasyonî esta, koxuşî qerebalix ê, tepişteyî nêeşkenê pakîya xo bîyarê ca. Xeylêk tepişteyî zî ganî bi nîzamî şorê nêweşxaneyan.''

Nuraye Çevîrmen vist vîrî ke ê wazenê pêro tepişteyî bi hawayêkê têdûştî qanûnê înfazî ra îstîfade bikerê û vat: ''Amadekarîya nê qanûnî de rêxistinanê komelê sivîlî, partîyanê sîyasîyan û huqûqnasan reyde pêvînayîş nêame kerdene. Rojnameger, nuştox, sîyasetmedar û şaredarî tepişte yê. Tepişteyê nêweşî û kokimî zî hema zî vera nêdîyayî. Bi hezaran tepişteyî zîndanan de kenê ke biciwîyê. Qanûnê înfazî cîyaker o.''