Tepişteyo sîyasî Şeyhdavût Başkano ke Zîndanê  Bunyanî yê Kayserî yê Hûmara 1'ine de yo, îdareyê zîndanî pîya bi 4 embazanê ey xapînayî  û înan rê vato ma şima bênê nêweşxane la cayê înan bedilnayo, herinda hûmara diyîne de ê hûmara yewine yê heman zîndanî de ca kerdî. Verba nê binpaykerdişan Başkan 87 rojî yo grevê vêşanîye de yo.

Şeyhdavût Başkano ke verba tecrîdkerdişê Rayberê Şarê Kurdî Abdullah Ocalanî kewtibi grevê vêşanî, 26'ê Gulane de seba ke ey berê muayeneyê sewqê Zîndanê  Bunyanî yê Kayserî yê Hûmara 1'ine kerd. Başkanî pê rayîrê keyeyî eşkera kerd ke eke ey reyna nêerşawe nêweşxane, dest pê grevê vêşanî biko. Naye ra babî Şeyhmus Başkanî muracatê ÎHD'yî yê Amedî kerd. Seba ke waştişê Başkanî nêame ca, 9'ê Temmuze de dest pê grevê vêşanîye kerd. Başkan seba ke ey reyna sewqê zîndano verên bikê 87  rojî  yo grevê vêşanî de yo. Başkanî bi rayîrê keyeyê xo da zanayene ke eke waştişê ey merê ca o do dest bi rojeyê mergî bikero.

'Heqê Merdiman Yenê Binpaykerdene'

Babî Şeyhmus Başkanî ajansê ma reyde qisey kerd û va: ‘‘Tewr peynî de 2'ê  Êlule de mi lajê xo reyde telefon de qisey kerd. Lajê mi se ra 44 astengdarê zîhnî yo. Ne ey tedawî kenê ne zî heqanê ey ê merdimî danê. Kamcin suc kerdibi zî ganî bêro dermankerdene. Merdimîya winasêne nêbena. Ne kitab ne zî rojnama danê tepişteyan. Ne zî kontrolê weşîye kenê. Ez tim firsend nêvîneno ke şêro Kayserî. Ez na bêhuqûqîye eşkera kena, bêrê paşt bidê mi. Mi pê destê xo zîndanî rê waştişname nuşt. La ey tedawî nêkerd, zîndanê ci bedelnayê. Dozgerî vat ke her çi destê Wezaretê Edaletî de yo. Mi rê va ke waştişnameyê mi do bierşawo uca. Mi ÎHD'yî rê muracat kerd. Eke çîyêk bêro sereyê lajê mi berpirsîyar Wezaretê Edaletî yo. Ez do ca nêverdî. Eke hewce bikero ez do muracatê Mahkemeya Heqanê Merdiman ê Ewropa bikerî."