Ame parekerdene ke roja sêşemeyî saetanê nêmroje de roqilayanê Sabrî Kayayî ra gonî hêrikîyaye û wedarîya Nêweşxaneyê Dewlete yê Osmanîye. Kaya xîretanê keyeyê xo ra dima erşawîya beşê ciewnîyayîşê giranî. Rewşa weşîye ya Kayayî hema zî xirab a.

Kênaya Sabrî Kayayî Dîlan Kaya Ajansê Mezopotamya reyde qisey kerd û vat: ''Se ra 30 cuya babîyê mi binê rîskî de ya. Hema zî ci rê gonî yena dayene.Hêrikîyayîşê gonîye zî hetêkî ra dewam keno. Ganî heta roja dişemeyî beşê ciewnayîşê giranî de bimano. Verî ke bimiro babîyê mi wa bêro veradayene.

Kayayî 25ê adare de krîzê qelbî û hêrikîyayîşê gonîya mezgî vîyartî û hîrê reyî gêrîyayî beşê ciewnîyayîşê giranî. Her reye zî ame vatene ke rewşa ci hol a û tepîya erşawîya zîndan. Kaya tewr tay 30 reyî zî wedarîya Nêweşxaneyê Dewlete yê Osmanîye û reyna erşawîya zîndan.

Kayayî 6ê gulane de pêvînayîşê telefonî de keyeyê xo rê vatbi ke: ''Hînî qewetê mi çin o ke ez daymîş biba. Ez do bimira.''