Tepişteyo nêweş Mehmet Emîn Ozkano 83 serre Zîndanê Amedî ra verî sewqê Xarpêtî ame kerdene û dima zî sewqê Dezgehê Tipê Edlîyî yê Îstanbulî ame kerdene.

Avûkate Aslihane Bulut pare kerd ke Ozkan ewro do bêro berdene bi Îstanbulî û vat: ''Ma nêzanenê Îstanbul de kamyew zîndanî de o do bêro cakerdene.''

Ozkan 1996 de Mersîn de pê sûcdarîya 'endamîya rêxistine' amebi destbendkerdene û pê bahaneya kişîyayîşê Tuggeneral Bahtîyar Aydin cezaya muebede dîyaye ci. Ozkan 25 serrî yo zîndan de yo û nê serran de 5 reyî qelbê ci vindert, 4 reyî anjîyo bi. Ozkan de nêweşîyê guatr, tansîyon, helîyayîşê esteyan, nêweşîyê roqlayan û qelsbîyayîşê hîşî estê.