Teqayîşê Şemzînanî de 7 leşkerî vîndîbîyaye yê, 25 zî birîndar ê

Bargehê Qilê Sungu yê dewa Derecîk Ortaklar ya Şemzînanî yê Colemêrgî de ke herêma sînorî de ya qereqolî de teqayîş virazîya. Ame zanayene ke teqayîşî de tewr tay 7 leşkerî vîndî bîyî, 25 tenî zî birîndar bîyî.

Walîtîya Colemêrgî îdîa kerd ke teqayîş netîceyê înfilaqkerdişê muhîmatêk de virazîyayo. La hewna na haydarîye hetê çimeyanê xoseran ra nêamî raştkerdene.

Walîtî tenya qîmê xo bi vatişê “Netîceyê teqayîşî de personelê ma yê eskerîyî birîndar bîyê” ard û hûmarêk nêdaye.

QEDEXEYÊ WEŞANÎ

Wezaretê Pawitişî yê Milîyî zî da zanayene ke 25 leşkerî nêweşxane de gîrîyayê têdawî. Heman eşkerayîye de dîya zanayene ke 7 leşkerî vîndî yê.

Balkêş bi ke dimayê teqayîşî ra Hakimîya Cezaya Sulhî ya Şemzînanî derheqê teqayîşê Qilê Sunguyî de qedexeyê weşanî îlan kerd.  

DÎMENÎ

Dîmenê ke têkildar ê teqayîşî vila bîyî ramojnenê ke teqayîş xeylî bişidet bîyo. Dîmenan de vengan ra yew vano “bira çiqa barût mend, guleyî teqayî ma nêzanê.” Wareyo ke bi temamî raşîyayo ra yewna veng yeno û vano “çew ûca esto?”