AKPyo ke 22 serran o îqtîdarê Tirkîya de yo, pê viraştişê zîndanan wesfê xo dano. AKPyî bi seyan zîndanê neweyî viraştî, metodê tecrîdî yê neweyî ceribnayî. Tirkîya welatêko winayên o ke tewr zaf tede domanî tepişte yê. Heta temmuze 2 hezar û 572 domanî zîndananê Tirkîya de tepişte û hukmwerde bîyî. Zîndanan de zî domanê tepişteyê sîyasîyî raştê cîyakerîye yenê.

Karanê Domananê Tepişteyan ê Komeleya Komelê Sivîlî yê Sîstemê Înfazê Ceza (CISST) ra Cansuye Şekercî ANFyî rê qisey kerd û ard ziwan ke goreyê doneyanê temmuza 202yî 2 hezar û 572 domanî zîndanan de yê. Mîyanê nê domanan de xeylêk domanî zî Qanûnê Têkoşînê Vera Terorî ra tepişte yê. Cansuye Şekercî da zanayene ke înan derheqê domananê 0-6 serranê ke zîndan de hetê dadîya xo de manenê de muracatê Mudirîya Zîndanan kerdo la cewab nêdîyayo înan. Şekercîye pare kerd ke ê nêzanenê ke çend domanê 0-6 serrî zîndan de yê.

Şekercîye îfade kerd ke domanî bi giranî 'sûcanê vera mal û mulkan' ra tepişte yê û vat ke domanê ke wextêkê dergî ra nata zîndan de yê, bi îdîaya kiştişî, talan û muxalefetê vera Qanûnê Têkoşînê Vera Terorî tepişîyayê.

Şekercîye dîyar kerd ke domanî ganî zîndanan de bi taybetî zîndananê domanan de tepişîyenê la Tirkîya de rewşe wina nîya. Şekercîye vat: ''Rixmo ke Tirkîya de zîndanê domanan est ê, domanî û bi taybetî domanê sîyasîyî qestî ra zîndananê dûran rê yenê yenê sewqkerdene. Na babete de bi taybetî domanê kênayî raştê cîyakerîyî yenê.''